Qandaı mobıldi qosymshalar derbes derekterińizge qol jetkize alady

Qosymshany ornatý kezinde kóptegen adam servıstiń jumysy úshin onyń shynymen qajet ekenin baǵalamaı, suralǵan qoljetimdilikke avtomatty túrde kelisedi. Nátıjesinde ondaǵan ornatylǵan baǵdarlamalar kameraǵa, mıkrofonǵa, kontaktilerge, geolokatsııaǵa, faıldarǵa jáne basqa da derekterge qol jetkize alady.

Artyq ruqsattar derbes aqparattyń taralyp ketý, ony zańsyz paıdalaný jáne alaıaqtyq shabýyldar jasaý qaýpin arttyrady.

Qosymshalar qandaı derekterdi surata alady?

Qoldanbalardyń fýnktsıonaldyǵyna baılanysty mynalarǵa kirýge ruqsat suraı alady:

geolokatsııaǵa — qurylǵynyń ornalasqan jerin anyqtaý úshin;

kamera jáne fotogalereıaǵa — foto jáne beıne jasaý nemese saqtalǵan faıldarǵa qol jetkizý úshin;

mıkrofonǵa — aýdıo jazý jáne jiberý úshin;

kontaktilerge — telefon kitabyna qol jetkizý úshin;

faıldarǵa jáne qurlyǵynyń jadyna — qujattarmen jáne basqa da faıldarmen jumys isteý úshin;

qońyraýlar men SMS-ke — onyń ishinde rastaý kodtary bar habarlardy oqý úshin;

habarlamalarǵa — derbes aqparatty qamtýy múmkin habarlardy jiberý úshin.

Árbir ruqsatty berý qajettiligi qosymshanyń fýnktsıonalyna sáıkes kelýi tıis. Mysaly, kóptegen jaǵdaıda kalkýlıator nemese fonar kontaktilerge, SMS nemese geolokatsııaǵa qol jetkizýdi talap etpeıdi.

Qosymshalarǵa artyq ruqsat berýdiń qandaı qaýpi bar

Eger qosymsha nemese ony ázirleýshiniń ınfraqurylymy kıbershabýylǵa tap bolsa, alynǵan derekter qoldy bolyp, qaskóıler olardy qoldanýy múmkin.

Atap aıtqanda, aqparat mynalar:

— derbes fıshıngtik shabýyldardy daıyndaý;

— áleýmettik ınjenerııa jáne alaıaqtyq;

— basqa akkaýnttarǵa qoljetimdilik alý;

— paıdalanýshynyń naqtylanǵan tsıfrlyq beıinin qurý;

— derbes derekterdi zańǵa qaıshy taratý nemese kommertsııalyq paıdalaný úshin qoldanylýy múmkin.

Erekshe nazar olardyń negizgi fýnktsııalarymen baılanysty emes ruqsatty suraıtyn qosymshalarǵa aýdarylýy tıis.

Eń aldymen qandaı ruqsattardy shekteý qajet? 

Geolokatsııa. Ornalasqan jerin turaqty túrde anyqtaýdy qajet etpeıtin qosymshalar úshin «Qosymshany qoldaný kezinde» rejımin tańdaý nemese qoljetimdilikti tolyǵymen óshirý qajet.

Kamera jáne mıkrofon. Ol jumys úshin shyn máninde qajet bolatyn qosymshalarǵa ǵana qoljetimdilik berińiz.

Baılanystar jáne faıldar. Eger qosymshanyń fýnktsıonaly telefon kitapshasymen nemese qujattarmen jumys isteýdi kózdemese qoljetimdilikti shekteńiz.

Qaı kezde saq bolǵan jón?

Myna jaǵdaılarda qosymshany paıdalanbas buryn muqııat bolǵan jón:

— qosymsha óz fýnktsııasyna qatysy joq kóptegen ruqsatty surasa;

— ázirleýshi týraly aqparat tolyq bolmasa nemese kúmán týdyrsa;

— qosymsha belgisiz nemese resmı emes derekkózden júktelse;

— qosymshada úzdiksiz jarnama nemese kúmándi qalqymaly terezeler paıda bolsa;

— qosymsha qajet bolmasa da SMS habarlamalaryna, kontaktilerge, tólem aqparatyna jáne basqa da qupııa derekterge qol jetkizýdi talap etse.

— Derbes derekter qaskóıler maqsatty alaıaqtyq shabýyldar daıyndaý úshin paıdalanatyn qundy aqparat bolyp sanalady. Qosymshaǵa óz jumysyńyzǵa qajetti mólsherde ǵana ruqsat berińiz. Ruqsattardy júıeli túrde tekserý — derbes derekterdi qorǵaýǵa jáne tsıfrlyq qaýipsizdik deńgeıin arttyrýǵa kómektesetin qarapaıym ádet, — dep eskertti agenttik mamandary.

Budan buryn telefon alaıaqtyǵyna qarsy jańa tetikter qashan kúshine enetinin jazdyq.