Qandaı mamandyq ıeleri «Ata joly» kartasyn aldy

ASTANA. KAZINFORM – «Ata joly» kartasy ıeleriniń quqyqtary men mindetteri edáýir keńeıtilmek. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Qazaqstan Respýblıkasynyń 2023-2027 jyldarǵa arnalǵan Kóshi-qon saıasatynyń tujyrymdamasyna sáıkes basqa elderdegi etnıkalyq qazaqtardyń tarıhı otanymen baılanysyn nyǵaıtý jáne joǵary bilikti kadrlardy tartý maqsatynda «Ata joly» kartasy engizildi. 2025 jylǵy 1 qazanǵa jergilikti atqarýshy organdar tarapynan 71 «Ata joly» kartasy (153 adam), onyń ishinde 28 karta (74 adam) shetelde jumys istep turǵan bıznesi bar (Reseı, Qytaı, Aýǵanstan, Ulybrıtanııa, Mońǵolııa, AQSh, Aýstrııa, Izraıl, Germanııa, Túrkııa, Ózbekstan jáne Túrikmenstan) bıznes-ımmıgranttarǵa berildi. Olar melıoratsııa, rekýltıvatsııa jáne jerdi qorǵaý, fızıka jáne ınformatıka, aýyl sharýashylyǵyn mehanıkalandyrý mamandary, dárigerler jáne taǵy basqalary. 42 karta (78 adam) suranysqa ıe qajetti mamandarǵa (Reseı, Germanııa, Mońǵolııa, Qytaı, AQSh, Izraıl, Frantsııa, Ulybrıtanııa, Nıderlandy, Fınlıandııa, Shvetsııa, Aýstralııa, Qyrǵyzstan, Ózbekstan) berildi. Olar ınjener-fızık, ınjener-matematık, hımııalyq tehnologtar, jaq-bet hırýrgııa dárigerleri, pedıatrlar jáne basqalary. 1 karta (1 adam) Qazaqstan Respýblıkasynyń azamattyǵyn alýyna baılanysty joıyldy, - dedi Úkimet basshysy jaýabynda.

Onyń dereginshe, qazirgi ýaqytta «Ata joly» kartasyn jetildirý maqsatynda zań jobasy ázirlendi. Ol kelesi ózgerister men tolyqtyrýlar engizýdi: «Halyqtyń kóshi-qony týraly» Qazaqstan Respýblıkasynyń Zańyna – «Ata joly» kartasy ıeleriniń quqyqtary men mindetterin aıqyndaý; «Qazaqstan Respýblıkasynyń Ulttyq kásipkerler palatasy týraly» Qazaqstan Respýblıkasynyń Zańyna – kásipkerlik qyzmetti júzege asyrý kezinde kómek kórsetý; Eńbek kodeksine – jumysqa ornalastyrý kezinde biliktiligi teń bolǵan jaǵdaıda qosymsha artyqshylyq berý; Kásipkerlik kodeksine – jeke kásipkerlikpen aınalysý quqyǵyn berý; Jer kodeksine – jer ýchaskelerin alý quqyǵyn berý) kózdeıdi.

- Qazirgi ýaqytta zań jobasy memlekettik organdarmen jáne qoǵam belsendilerimen birlesip pysyqtalýda. Nátıjesinde Zań qabyldanǵan soń «Ata joly» kartasy ıeleriniń quqyqtary men mindetteri edáýir keńeıtiletin bolady, - dedi Oljas Bektenov.

Buǵan deıin senator Bekbol Orynbasarov depýtattyq saýalynda «Ata joly» kartasyn júzege asyrý barysynda anyqtalǵan kemshilikterdi ataǵan edi.