Qandaı elder Qytaıdan keletin týrısterge shekteýler engizýde

AMMAN. QazAqparat – Qytaıda kovıdke qarsy shekteýlerdi azaıtqannan keıin aýrý juqtyrǵandar sany ósip ketken tusta birqatar memleketter Aspanasty elinen keletin jolaýshylarǵa jańa talaptar qoıyp otyr, dep habarlaıdy QazAqparat tilshisi AFP–ke siltememen.

Qytaıdan keletin jolaýshylarǵa Covid-19 testie mindettep, basqa da erejelerdi qatańdatqan elderge qysqasha sholý usynamyz:

Amerıka Qurama Shtattary
5 qańtardan bastap AQSh Qytaıdan keletin barlyq jolaýshydan Covid–ke testten ótýdi talap etedi, testtiń teris nátıjesi eki kúnge ǵana jaramdy. Ol bolmasa sońǵy 90 kúnde koronavırýstan jazylyp shyqty degen anyqtama usynýy qajet.
AQSh aýrýlardy baqylaý ortalyǵynyń málimeti boıynsha, bul testige PTR testileý nemese antıgenge ózin tekserý kiredi.
Gonkong pen Makaodan keletinderge de osy talaptar qoıylady.
Eýropalyq Odaq
5 qańtardan bastap Frantsııaǵa Qytaıdan keletin barlyq jolaýshylar ushýdyń aldynda 48 saǵattan aspaıtyn ýaqytta jasalǵan PTR test nemese antıgenge ekspress-testiniń teris nátıjesin kórsetýi kerek.
Italııa men Ispanııa da Covid testileýi kerek degen talap qoıyp otyr.
Evropa elderi osy aptada jıyn ótkizip, osy máseleni talqylamaqshy. Al bıyldan EýroOdaq tóraǵasy bolǵan Shvetsııa EO–ǵa kirýge shekteý qoıý máselesinde búkil Odaqqa ortaq saıasat qarastyrylyp jatqanyn málimdedi.
Avstralııa
Avstralııa da Qytaıdan, sonyń ishinde Gonkong men Makaodan da keletinderge Covid-19 teris test nátıjesin talap etedi. Olar muny Beıjińnen koronavırýstyń órshýi jaıly naqty aqparattyń bolmaýymen túsindirip otyr.
Kanada
Kanada Qytaıdan keletin barlyq jolaýshydan sońǵy eki kúnde Covid–ke testten ótýdi talap etedi.
Birikken Koroldik
5 qańtarda kúshine enetin erejelerge sáıkes, Ulybrıtanııaǵa Qytaıdan keletin barlyq jolaýshylar elge qonbaı turyp testten ótýi tıis.
Ulybrıtanııa úkimeti sonymen birge jańa shtamdardy anyqtap otyrý úshin kelýshilerdiń keıbirin qosymsha tekseretinin málimdedi.
Izraıl
Izraıl Qytaıdan keletin sheteldikterden Covid testinen ótýdi talap etedi. Áýejaılarda óz erkimen teksrilgisi keletinderge arnap skrınıng ortalyǵy ashyldy.
Japonııa
Japonııa Qytaıdan keletinderge jańa shekteýler engizgen alǵashqy elderdiń biri boldy. Japon eline de kirý úshin koronavırýsqa testiń teris nátıjesin kórsetý kerek.
Kovıd anyqtalǵandar arnaıy mekemelerde jeti kúnge karantınge jatqyzylady. Bunymen qosa Tokıo qurlyqtyq Qytaımen aradaǵy reıster sanyn azaıtpaq.
Ońtústik Koreıa
Ońtústik Koreıa da Qytaıdan keletinderdi jiti tekserip, elge kirerdiń aldynda jáne kelgen kezde taǵy da Covid teris test nátıjesin talap etedi. Al Gonkong pen Makaodan keletinderge bul ereje qatysty emes.
Úndistan
Úndistan da Qytaıdan jáne Azııanyń birqatar ózge elderinen kelgenderge Covid testin talap etedi, teris nátıje elge kirmes buryn 72 saǵat ishinde alynǵan bolýy qajet.
Marokko
Afrıkanyń soltústiginde ornalasqan Marokko eli eń qatal sharaǵa baryp otyr. Olar Qytaıdan keletin jolaýshylarǵa elge kirýge tyıym saldy. Ol tyıym 3 qańtarda kúshine enip, odan ári habarlama túskenshe saqtalady. Eldiń SІM habarlaýynsha, bul qadam «Marokkoda jańa tolqyn jáne onyń saldary bolmas úshin jasalyp otyr».
2022 jylǵy jeltoqsanda Qazaqstanda koronavırýspen aýyrý kórsetkishi ótken aımen salystyrǵanda 2,4 ese ósti. QR densaýlyq saqtaý vıtse-mınıstri Aıjan Esmaǵambetovanyń aıtýynsha, «Tserber» shtamy álemniń 65 astam elinde anyqtalǵan jáne burynǵy «Omıkronnan» esh aı yrmashylyǵy joq. Ol aýrý jeńil túrdegi tumaý sekildi ótetinin atap ótti.
Avtory: Arsen Óteshev