Qandaı ekpeni koronavırýs vaktsınasymen birge alýǵa bolmaıdy
ALMATY. QazAqparat - Qandaı ekpeni koronavırýs vaktsınasymen birge alýǵa bolmaıdy. Bul saýalǵa onlaın brıfıng barysynda S. Asfendııarov atyndaǵy QazUMÝ jalpy ımmýnologııa kafedrasynyń meńgerýshisi Elmıra Bıtanova jaýap berdi, dep habarlaıdy QazAqparat tilshisi.
«Tiri vaktsınany BTsJ ekpesimen birge alýǵa bolmaıdy. Bul barlyq vaktsına úshin jalpy ereje. Koronavırýs ınfektsııasyna qarsy vaktsına endi ǵana qoldanyla bastady. Sondyqtan ony keshendi túrde qoldaný usynylmaıdy, bul ýaqytsha shara. Biraz ýaqyttan keıin ol basqa vaktsınalarmen biriktirile bastaıdy. Ázirge mundaı usynys joq. Qazir kene entsefalıtine qarsy maýsym bar, biraq tiri vaktsınany biriktirý múldem múmkin emes. Koronavırýsqa qarsy vaktsınany bólek qoldanýdy usynamyn», - dedi ol.
Sonymen qatar, Elmıra Bıtanova vaktsınatsııadan keıin ımmýnıtettiń qansha ýaqytqa deıin saqtalatynyn atap ótti.
«Bul ınfektsııa 2019 jyly bastaldy, ımmýnıtetti saqtaýdyń boljamy eki jyl dep otyrmyz. Bul boljam. Bizge áli eshkim kepildik bere almaıdy. Biz qazir vırýsty toqtatqymyz keledi. Vaktsınalar áli de jetildiriledi», - dep qosty ımmýnolog.
