Qandaı aspazdyq ónimder áleýmettik mańyzy bar taýarlar qataryna kirmeıdi

ASTANA. KAZINFORM — Tartylǵan etten basqa aspazdyq buıymdar, aspazdyq jartylaı fabrıkattar men daıyn aspazdyq ónimder áleýmettik mańyzy bar azyq-túlik taýarlarynyń qataryna jatpaıdy. 

Bul týraly Astana boıynsha saýda jáne tutynýshylardyń quqyqtaryn qorǵaý departamentiniń basshysy Ǵalymjan Ilıasov málimdedi. Onyń aıtýynsha, bul talaptar QR Densaýlyq saqtaý mınıstriniń 2021 jylǵy 28 sáýirdegi № QR DSM-36 buıryǵymen bekitilgen «Tamaq ónimderin óndirý jónindegi obektilerge qoıylatyn sanıtarııalyq-epıdemıologııalyq talaptar» sanıtarııalyq qaǵıdalaryna sáıkes aıqyndalǵan.

— Atalǵan qujatqa sáıkes aspazdyq buıym — aspazdyq daıyndyqqa deıin jetkizilgen tamaq ónimi nemese ónimder qosyndysy, aspazdyq jartylaı fabrıkat — daıyn kúıine jetkizilmeı, bir nemese birneshe ret óńdeýden ótken tamaq ónimderi, al aspazdyq ónim — aspazdyq jartylaı fabrıkattar men daıyn taǵamdardyń jıyntyǵy bolyp sanalady, — dedi spıker.

Sonymen qatar Ǵalymjan Ilıasov marınadtalǵan qııar men qyzanaq, marınadtalǵan et jáne taýyq ónimderi, sondaı-aq QR ST 1034-2000 memlekettik standartyna sáıkes portsııalanǵan jáne usaq kesekti et jartylaı fabrıkattary áleýmettik mańyzy bar azyq-túlikke jatpaıtynyn atap ótti.

— Olardyń qatarynda kotletter, teftelı, frıkadelka, bıfshteks, bıtochkalar, shnıtsel, romshteks, gýlıash, podjarka, azý, befstrogan, káýapqa arnalǵan et, ragý, sorpa jıyntyǵy, kýpattar, langet, eskalop jáne antrekot bar, — dedi Ǵalymjan Ilıasov. 

Onyń aıtýynsha, áleýmettik mańyzy bar azyq-túlik taýarlaryna 15 paıyzdan joǵary saýda ústemesin belgileý ákimshilik jaýapkershilikke ákep soǵady.

Buǵan deıin Astanada áleýmettik mańyzy bar azyq-túlik taýarlarynyń tizimi ýaqytsha keńeıtilgenin jazǵanbyz.