Qandasymyz Ýálıhan Serikuly Qytaı chempıonatynda altynnan alqa taqty

ÚNJÝ. QazAqparat - Shyńjańdyq qandasymyz Ýálıhan Serikuly grek-rım kúresinen Qytaı chempıonatynyń altyn medalin utyp aldy, dep habarlaıdy QazAqparat tilshisi.

Bul jarys búgin Qytaıdyń Únjý qalasynda bastalǵan bolatyn. Ýálıhan Serikuly 63 keli salmaqta óner kórsetip, fınalda shanhaılyq qarsylasyn 9:0 esebimen utty. Qandasymyz osydan keıin Olımpıadaǵa lıtsenzııalyq irikteý týrnırine qatysatyn bolady.

Ý.Serikuly – 1993 jyly Shyńjańnyń Dórbiljin aýdanynda dúnıege kelgen. Qytaı quramasynyń sapynda óner kórsetedi. Qytaı chempıonatynyń 4 dúrkin júldegeri, Majarstan astanasy Býdapeshte ótken álem chempıonatynyń qola júldegeri, Azııa chempıonatynda 3-oryn ıelengen.

Ýálıhannyń bapkeri Álnur Tórgeuly – halyqaralyq dárejedegi sport sheberi, Azııa chempıonatynyń kúmis júldegeri. Qytaı atynan 2004 jylǵy Afıny Olımpıadasyna qatysqan.