Qandasymyz álem qazaqtary arasyndaǵy úzdik sportshylar týraly kitap shyǵardy
Tusaýkeserdi Qazaqstan jazýshylar odaǵy basqarma tóraǵasynyń orynbasary, aqyn Baqyt Bedelhan júrgizdi.
«Búgin mine, qazaq dalasynyń rýhyn asqaqtatatyn «Sańlaq» atty kitaptyń tusaýkeserin ótkizip otyrmyz. Elimizdegi ǵana emes, jer júzindegi qazaq sportshylarynyń basyn qosqan óte aýqymdy dúnıe, úlken eńbek. Osynshama jerdi, osynshama dalany qorǵaýǵa sańlaqtarymyzdyń qosqan úlesi zor. Shynymen batyrlyq pen rýh bolmaǵan jerde bundaı dalany ustap turý múmkin emes. Álemniń 16 elinde qazaq tarlandary ulttyń atyn ulyqtap jatyr. Eldiń rýhyn kóteretin – sport»,-dep atap ótti B. Bedelhan tusaýkeser rásimiń ashylýynda.
Sondaı-aq, atalmysh kitaptyń tusaýkeserine Álem jáne Olımpııa oıyndarynyń qola júldegeri, kásipqoı bokstan orta salmaqta WBO International chempıony, boksshy Qanat Islam, ál-Farabı atyndaǵy QazUÝ jýrnalıstıka fakýltetiniń aǵa oqytýshysy, «Alash» halyqaralyq ádebı syılyǵynyń ıegeri, aqyn Murat Shaımaran, «Jasyl álem» demalys ornynyń dırektory, kásipker Ermek Keńeshan qatysty.
«Meniń qýanyp otyrǵan jerim - bul kitapqa elimizdiń ǵana emes, álemge tarydaı shashylyp ketken qazaqtyń arasynan shyqqan sportshylar kirgeni. Bul kitap ár úıdiń sóresinde turýǵa tıis, óıtkeni osy sportshylardyń jetistikterin oqyǵan bala osylarǵa qarap talpynyp ósedi. Qazaq sportyna, qazaq rýhanııatyna osyndaı úlken dúnıe usynǵany úshin Dáýren baýyrymyzǵa alǵys aıtýymyz kerek», - dep atap ótti Murat Shaımaran.
Sondaı-aq, shara barysynda boksshy Qanat Islam kitapqa joǵary baǵa berip, avtorǵa alǵysyn aıtty.
«Dáýren baýyrymyzdyń kóz maıyn taýysyp jazǵan bul dúnıesi - úlken eńbek, eren erlik. Namys pen batyrlyq rıngte júrgen bizge ǵana tán emes, ol ár qazaqtyń boıynda bolýy tıis, meıli ol sportta, bızneste álde bılikte júrsin. Alla buıyrsa bul kitapty ary qaraı nasıhattaýǵa atsalysamyz dep oılaımyn», - dedi ol.
Qurastyrýshy-avtor bul eńbekti jınaqtaý úshin 8 jylǵa jýyq ýaqyt ketkenin, birneshe elde bolyp, sportshylarmen tildesip, suhbattasqanyn tilge tıek etti.
«Kitapqa qazaqtyń kúsh atasy atanǵan Qajymuqan Muńaıtpasuly, eń alǵash olımpıadaǵa qatysqan Mońǵolııadaǵy jelaıaq apamyz Aldanysh Ramazanqyzy, eń alǵashqy olımpıada chempıony Áljan Jarmuhammed, ishegin súıretip júrip alyppen alysqan Qytaıdaǵy qazaq palýany Serik Qojabaıuly bastaǵan sheteldegi 150-ge jýyq tarlan sportshy, burynǵy Keńes odaǵy men búgingi táýelsiz Qazaqstannan álemdik, olımpıadalyq dodalarda top jarǵan sportshylardy negiz etken 350-den astam, jalpy 16 memleketten 500 qazaq sportshysynyń deregin toptadyq. Eń alǵash bul kitaptyń bastamasyn 2016 jyly «Qytaıdaǵy qazaq sportshylary» degen atpen shaǵyn kitapsha shyǵarýmen bastap edim. Keıin bul úrdis Mońǵolııada eki ret shyǵarmashylyq saparda bolyp, ol jaqtaǵy qandas sportshylardy da óz aldyna shaǵyn jınaq etip daıyndaǵa ulasty. Ary qaraı derek izdep, Ózbekstan, Qyrǵyzstanǵa baryp qaıttym. Sońynda Qazaqstan sportshylaryn da qosyp, álemdegi barlyǵy bolmasa da, biraz qazaq sportshylaryn bir «shańyraq» astyna jınap-toptap, mine, búgin ózderińizge «Sańlaq» degen atpen usynyp otyrmyn»,- dep aǵynan jaryldy avtor.
Árıne, bul osynsha ǵana qazaq sportshysy bar degendi bildirmese kerek.
«Múmkindiktiń shekteýli bolýy baılanysty áli de talaı tulǵalar osy toptamadan tys qaldy. Sol úshin esimi elenbeı emes, enbeı qalǵan qalǵan sańlaqtardan keshirim suraımyn. Kelesi kezeńde osy olqylyqtyń orny tolady-aý degen oıdamyn. Ol endi aldaǵy kúnniń enshisinde», - dedi bul týraly Dáýren Baqytqajyuly.
Kitaptyń tusaýkeserin aldaǵy kúnderde Astana qalasynda, Ózbekstannyń, Mońǵolııa memleketterinde ótkizýge usynystar kelip jatqanyn aıtady.
Aıta keteıik, avtor Dáýren Baqytqajyuly – 1989 jyly Qytaıdyń Tarbaǵataı aımaǵynda dúnıege kelgen. Alty kitaptyń avtory.
Shyńjań qazaq mádenıet qoǵamynyń jáne ádebıet-kórkemónershiler birlestiginiń múshesi.
