Qandastarymyzdyń shet elden kelgendigin bildiretin quqyqtyq uǵym retinde "oralman" sózi alynǵan
ASTANA. Qazannyń 29-y. QazAqparat /Marlan Jıembaı/ - Qazir «oralman» degen ataý durys emes, Qazaq - bireý, Qazaqstan - bireý. Sondyqtan olardy «otandastar» nemese «qandastar» dep ataıyq», degen pikirler aıtylýda. Siz osyǵan ne deısiz, degen saýal búgin www.bnews.kz portalynda ótken Online-konferentsııa barysynda QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishevke qoıyldy,
dep habarlaıdy QazAqpart.
«Bul máseleni biz jańa zańǵa kirgizip otyrmyz. Bizde qazirgi ýaqytta 10-ǵa jýyq pikir bar. «Etnıkalyq qazaq», «otandastar», «qandastar» degen sııaqty balama sózder usynylyp jatyr», dedi ol.
Komıtet tóraǵasynyń aıtýynsha, kórshi Qytaıda oralman degen aty bar adam ózin maqtanyshpen sezinedi eken. Sonymen qatar, mundaı uǵym basqa elderde de bar kórinedi. Jalpy bul ataý qujat alǵanǵa deıin ǵana, al qujat alǵannan keıin ol oralman emes. Qazaqstanǵa shet elden oralǵan qandastarymyzǵa oralman ataýyn berýdiń birneshe sebebi bar. Atap aıtqanda, memleket tarapynan beriletin kómekterdi alý úshin, shekaradan ótkende baj salyǵyn salmaý úshin, azamattyq alýǵa qujat tapsyrǵan kezde salyq tólemeý úshin qajet eken.
«Jalpy qazaq emes shetten kelgen kez kelgen azamat óziniń banktegi esepshotynda 10 myń dollary bar ekendigin dáleldemeı, azamattyqqa qujat ótkize almaıdy. Al qandastarymyz oralman kýáligin kórsetý arqyly tegin azamattyq alady», deıdi Q.Ábishev.
Sondyqtan qoldanysqa memlekettik qyzmetker degen sııaqty quqyqtyq termın qajet. «Oralman» sózi qandastarymyzdyń shet elden kelgendigin bildiretin quqyqtyq uǵym retinde alynǵan.
