Qandastarymyz Shákárimniń qoljazbasyn 80 jyl boıy saqtap kelgen
Qytaıda turatyn qazaqtardyń arasynda asharshylyq kezinde qýdalaýǵa ushyrap, shekara asyp ketkender kóp bolǵany barshaǵa málim. Solardyń ishinde Shákárimniń kenje uly Zııat ta bar. Ol shekara asarda ózimen birge ákesi Shákárimniń qoljazbalaryn alyp ótken. Keıinnen Keńes úkimeti ony Qytaıdan da taýyp alyp, keri qaıtarǵan. Biraq ustalardan buryn Zııat ákesinen qalǵan murany jergilikti qandastaryna amanat etip úlgeripti. Olar 80 jyl boıy sol murany saqtap, keıin amanat etip Qazaqstanǵa jibergen. Otyzynshy jyldary Zııat Shákárimuly Qunanbaıdyń urpaqtarymen birge Qytaı asyp, Tarbaǵataı, Altaı taýlaryn panalaǵan. Zııat Qytaı jerinde júrip te oqý-aǵartý jumystaryna belsendi qatysady. «Shyńjań-Altaı» gazetinde qyzmet istegen jyldary Alash qozǵalysynyń belsendilerimen qoıan-qoltyq aralasady. Keıinnen 1936 jyly qyzmet babymen Úrimshige qonys aýdarady. Sonda ol tuńǵysh ret óziniń qupııasyn ashady.
«Kárim Dúısebaev degen kisi Qazaqstannan qashyp kelgen. Osy adamǵa Zııat: «Men Úrimshige ketip bara jatyrmyn. Ol jaqta qazaq az. Siz qalyń qazaqtyń arasynda otyrsyz ǵoı. Mynaý ákemniń qoljazbasy edi. Qudaıǵa amanat, sizge amanat!» - dep tapsyrǵan eken», - deıdi jazýshy, aqyn Kóben Asqaruly.
Bul qundy qujat Kárimniń qolynda kóp turmaıdy. Ol da kóp zııalynyń izimen aıdaýǵa ketedi. Seziktense kerek, aıdalardan bir aı buryn asyl murany óziniń shákirti, Qytaı qazaqtarynyń jazba ádebıetin qalaýshylardyń biri Asqar Tatanaıulyna tapsyrǵan. Asqar ol kitapshany kóziniń qarashyǵyndaı saqtaıdy. Biraq ol jazbalar keıin joǵalady. Jyldar salyp kitapty Asqardyń uly Kóben taýyp alyp ákesine qaıta tabystaıdy.
«Ákeme ákelip bergenimde ol óziniń ákesi tirilgendeı qýandy. «Apyraı, jaryqtyǵym-aı, sen ólmegen ekensiń ǵoı»,- dep kózine jas aldy. Sodan saqtap keldik», - deıdi Kóben Asqaruly.
«Túrik, qazaq, qyrǵyz hám handar shejiresi» men óziniń óleńderi jazylǵan Shákárim qoljazbasy jarty ǵasyrdan astam ýaqyt osy januıada saqtalyp keldi. Búginde Kóbenniń uly Erlan ony Qazaqstanǵa alyp bardy. Qazir ol qundy murany otandyq ǵalymdar zerttep, anyq-qanyǵyn anyqtaýda. Al Kóben aǵamyz san jyldar saqtaǵan kitaptyń naq Shákárimniń qoljazbasy ekenine kámil senimdi.