Qandastarymyz da qazaq sportynyń gúldenýine óz úlesterin qosýy tıis - Nurjan Jumajanuly (FOTO)

Búgingi statıstıkalyq málimetterge súıensek, Elbasy N. Nazarbaevtyń kósheli kóshi-qon saıasatynyń arqasynda qazir elimizge taban tiregen qandastarymyzdyń sany mıllıonnan asypty. Bul Qazaqstannyń demografıalyq ósimine qosylǵan ólsheýsiz úles ekeni aıtpasaq ta túsinikti. Qazir elge oralǵan qandastarymyzdyń ishinde ózi qalaǵan kásippen aınalysyp, san salanyń úzdikteri atanyp júrgenderi de barshylyq. «Qazaqpyn, óz otanymda ómir súreıin, óz elime úlesimdi qosaıyn, urpaǵym qazaq topyraǵynda óssin» dep kelip, eline alaqan jaımaı, kerisinshe ata-jurtyma ne berem berem dep júrgen baýyrlarymyzdy kórgende Allaǵa shúkirlik etesiń, árıne!

Mine, sondaı qandastarymyzdyń biri - Qytaıdyń Altaı aımaǵy Qaba aýdanynan kelip, búginde Shyǵys Qazaqstan oblysy Kýrchatov qalasy boıynsha jasóspirimder sport mektebinde gir sportynan aǵa jattyqtyrýshy bolyp qyzmet atqaryp jatqan qandasymyz Nurjan Jumajanuly.

Eline oralyp eleýli eńbek jasap jatqan Nurjannyń jaqynda óz shákirtterimen birge Qostanaı qalasynda ótken gir sportynan Qazaqstan chempıonatyna qatysyp, júldeli qaıtyp bara jatqan jolynan kezdesip, suhbattasqan bolatynbyz.

- Júldelerińiz qutty bolsyn!

- Rahmet!

- Gir sportynan Qostanaıda ótken Qazaqstan birinshiligine qansha shákirtińiz qatysty?

- Men Kýrchatov qalasynan ózimniń qol astymda jattyǵatyn 4 balany ertip bardym. Bireýiniń baǵy men baby qatar shaýyp, Qazaqstan chempıony atandy. Taǵy bir sportshym tórtinshi orynǵa taban tiredi. Al qalǵan ekeýi 6-7-oryndardan kórindi. Bul el birinshiliginiń sportshylarymyz úshin mańyzy erekshe boldy. Chempıon atanǵan balalarǵa altyn medalmen birge osy jazda Latvııa elinde ótetin Eýropa chempıonatyna joldama berildi.

- Tórt balanyń bireýi chempıon atanýy úlken jetistik ekeni belgili. Shákirtińiz týraly tolyǵyraq aıtyp ótseńiz?

- Chemıonymnyń aty-jóni - Aqjol Jeńishanuly, 73 keli salmaqta synǵa tústi. Ustaz ben shákirttiń birlese jasaǵan eńbeginiń arqasynda barlyq qarsylastarynan oq boıy ozyq shyǵyp, jeńis tuǵyrynyń eń bıik satysyna kóterildi. Endi jazda Latvııaǵa baryp, Eýropa birinshiligine qatysatyn bolady.

- Jalpy, qolastyńyzda qansha bala jattyǵady?

- Gir sporty elimizde keremetteı damyǵan sport túri dep aıta almaımyn. Kóp jaǵdaıda mereke meıramdarda gir kóterýden jarystar bolyp jatady. Ol jaı áýesqoılyq. Al kásibı túrde endi-endi damyp keledi. Sondyqtan gir sportyna keletin balalardyń sany asa kóp emes. Biraq, men ózim jumys jasap jatqan shaǵyn aýdanda gir sportyna degen qyzyǵýshylyq óte jaqsy. Qazir qol astymda 20-dan astam bala jattyǵady. Tek uldar ǵana emes, qyz balalar da jattyǵyp jatyr. Mektebimizdiń jumys kestesine sáıkes balalar úsh aýysym boıynsha jattyǵady.

- Buǵan deıin de jetistikterge qol jetkizgen shákirtterińiz bar bolar?

- Árıne, ótken aıda ǵana 2003 jylǵy bir qyz balamyz Shyǵys Qazaqstan oblysynda ótken jasóspirimder arasyndaǵy el birinshiliginde bas júldeni jeńip aldy. Ótken jylǵy Shymkent qalasynda ótken el birinshiliginde eki shákirtim qorjynymyzǵa eki madal salyp qaıtty. Onda búgingi chempıon atanǵan Aqjol Jeńishanuly úshinshi orynǵa qol jetkizgen. Mine, bıyl bas júldemen birge Latvııada ótetin Evropa birinshiliginiń joldamasyn da jeńip alyp otyr. Osyndaı shákirtterimniń arqasynda aýdanymyz Shyǵys Qazaqstan boıynsha gir sportynan Óskemen qalasynan keıingi ekinshi orynda keledi. Bul bizdiń eńbegimizde ilgerileýshiliktiń bar ekenin kórsetedi. Endi Eýropa birinshiligine daıyndyqty bastaımyz.

- Bapkerlikpen aınalysýdyń qandaı qındyqtary bar?

- Óziń qalaǵan kásiptiń qıyndyǵyn qýanyshty jaqtary jeńip ketedi. Alǵashynda til jaǵynan azdap qıyndyqtar bolǵanyn jasyra almaımyn. Sebebi, ata-jurtymyzdaǵy bilim ordasynda ustazdyq etip, shákirt tárbıelep jatqan soń, «men tek qazaq balalaryn ǵana tárbıeleımin, solardy ǵana jattyqtyramyn» dep aıta almaısyń ǵoı. Bizdiń elimiz kópultty memleket. Qazirdiń ózinde qol astymda birneshe ult ókilderiniń balalary jattyǵyp jur. Solardyń ishinen kim sportty jalyqpaı jattyǵyp, myqtylyǵyn dáleldeıdi, sonymen ary qaraı jumys isteımiz. Men bapker bolǵandyqtan eshqashan, eshkimdi ultyna, rýyna bólgen emespin. Kim kelip, sportpen aınalysam dese, esigimiz ashyq.

- Oqý oryndaryńyzda sportty ary qaraı damytýǵa qanshalyq múmkindikter qarastyrylǵan? Balalardy jarysqa aparý barysynda qandaı qıyndyqtar kezdesedi?

- Oqý ordamyzda barlyq shart-jaǵdaı jasalǵan. Jergilikti ákimdikter, mektep basshylyǵy - barlyǵy da bizdiń sportymyzdy damytýǵa ózindik úlesterin qosyp keledi. Ár jarysqa baryp, júldeli oryndarǵa ilikkende qýanyshymyzdy quttyqtap, kelgende gúl shoqtaryn alyp, saltanatty túrde qarsy alady. Jarysqa attanarda da sáttilik tilep, jol shyǵyndarymyzdy kóterip, shyǵaryp salady. Budan artyq qandaı kómek bolsyn... Olarǵa alǵystan basqa aıtarymyz joq.

- Ózińizdiń sportta qandaı jetistikterińiz bar?

- Stýdent kezimde ózim de gir sportymen aınalystym. Shyǵys Qazaqstan oblysynyń gir sportynan bas jattyqtyrýshysy Ádil Ábdiǵalı degen aǵanyń qol astynda jattyǵyp, aýdandyq, oblystyq jáne el birinshilikterine qatysyp, kóptegen júldeli oryndarǵa ıe boldym. Alaıda, oqý bitirgen soń, jumysqa kirisip kettim. Biraq, sport muǵalimi oqýshylaryn jattyqtyra júrip, ózi de jattyǵady. Sebebi, tárbıelep jatqan shákirtteriń ózińe qarap ósedi. Sondyqtan áli kúnge jattyǵýdan qol úzgen emespin. Endigi maqsatym: ata-jurtyma adal eńbek etip, shákirtterim arasynan álem chempıondaryn shyǵaryp, álemdik rekordtar jasaý. Biz elimiz-jerimiz dep kelgen soń elge qyzmet etýimiz kerek. Qandastarymyz da qazaq sportynyń gúldenýine óz úlesterin qosýy tıis dep esepteımin.

- Áńgimeńizge kóp rahmet!

Suhbattasqan Kúnsultan Otarbaı