Qandastarymyz arasynda «Qasıetti qazaq eli» halyqaralyq óner festıvali ótedi
«Otandastar» qoǵamdyq qorynan habarlaǵandaı, atalǵan shara bıylǵy 1 mamyr men 7 shilde aralyǵynda ótedi.
Sharanyń basty maqsaty - Qazaqstanǵa kóship kelgen etnıkalyq qazaqtar men ózge elderde turyp jatqan qandastar arasynda halqymyzdyń ulttyq mádenıeti men salt dástúrin, tilin damytýǵa qoldaý kórsetý.
Festıvalda tórt nomınatsııa boıynsha baıqaý uıymdastyrylady. Atap aıtar bolsaq, múshaıra, terme, halyqtyq-qoldanbaly óner jáne vokaldan (ulttyq ólender) saıystar ótpek.
Baıqaýdyń irikteý kezeńderi oblystarda uıymdastyrylsa, fınaly jáne jeńimpazdar men júldegerlerdi marapattaý rásimi ústimizdegi jyldyń 7 shildesinde Nur-Sultan qalasynda ótedi.
Barlyq nıet bildirýshiler https://oq-bilim.kz saıtynda tirkeýden óte alady. Ótinimderdi 10 mamyrǵa deıin abeldinova@oq.gov.kz, kunakbaeva@oq.gov.kz elektrondyq poshtalarǵa jiberýge bolady.
