Qandastarǵa grantqa túsý úshin UBT-dan shekti ball jınaý mindetti emes
ASTANA. KAZINFORM — Shetelde turatyn ulty qazaq azamattar Qazaqstannyń joǵary oqý oryndaryna túsý úshin Ulttyq biryńǵaı testileýge (UBT) qatysa alady. Olar testileýdi qańtar, naýryz, negizgi jáne tamyz aılarynda tapsyrýǵa múmkindik alady.
Al Qazaqstanda bilim alyp jatqan qandastar úshin grant konkýrsyna qatysýdyń arnaıy tártibi qarastyrylǵan. Ulttyq testileý ortalyǵynyń málimetinshe, shetel azamattary UBT-ǵa app.testcenter.kz saıty arqyly tirkele alady. Testileý quny — 5 640 teńge.
Aqyly negizde oqýǵa túsýdi josparlaǵan talapkerlerge UBT tapsyrý mindetti emes. Olar joǵary oqý ornyna áńgimelesý nátıjesi boıynsha qabyldana alady. Al memlekettik bilim granty konkýrsyna qatysý úshin negizgi UBT-ny tapsyrý qajet. Grant konkýrsyna ótinishter sáýir aıynda qabyldanady.
UBT-ǵa qalaı tirkelýge bolady?
Tirkelý kezinde Qazaqstan azamatynyń jeke sáıkestendirý nómiri (JSN) bar talapkerler tıisti bólimge óz nómirin engizýi kerek. Eger talapker 18 jasqa tolmaǵan bolsa, ata-anasynyń nemese zańdy ókiliniń derekterin kórsetý qajet.
Al JSN-y joq shetel azamattary «QR JSN joq» bólimin tańdap, jeke derekterin toltyrady. Tirkeý aıaqtalǵannan keıin olarǵa 12 tańbaly kod beriledi.
Qandaı pánderdi tapsyrý qajet?
UBT pánderiniń sany oqý merzimi men tańdalǵan mamandyqqa baılanysty belgilenedi.
Tolyq oqý merzimi boıynsha:
-
ádettegi mamandyqtarǵa — 3 pán;
-
shyǵarmashylyq mamandyqtarǵa — 1 pán.
Qysqartylǵan oqý merzimi boıynsha (kolledj túlekterine):
-
ádettegi mamandyqtarǵa — 2 pán;
-
shyǵarmashylyq mamandyqtarǵa — 1 pán.
Shyǵarmashylyq emtıhandardy talapker tańdaǵan joǵary oqý orny ótkizedi.
Qazaqstanda oqıtyn qandastar grantqa qalaı qatysady?
Qazaqstanda bilim alyp jatqan qandastar UBT-ǵa «2027 jylǵy mektep túlekteri» sanaty boıynsha tirkelip, negizgi testileýdi 5 nemese 3 pánnen tegin tapsyra alady.
Memlekettik grant konkýrsyna qatysý kezinde ádettegi mamandyqtar úshin úsh pánniń, al shyǵarmashylyq mamandyqtar úshin bir pánniń nátıjesi esepke alynady.
Bul rette qandastar úshin grant konkýrsyna qatysý kezinde shekti ball belgilenbegen, ıaǵnı olar negizgi UBT nátıjesinde jınaǵan baldaryna qaramastan konkýrsqa qatysýǵa ótinish bere alady.
Osyǵan deıin qandas mártebesin qalaı úıden shyqpaı-aq alýǵa bolatynyn jazdyq.
