Qandastardyń Túrikmenstannan Qazaqstanǵa qonys aýdarý máselesi talqylandy

NUR-SULTAN. QazAqparat - Konsýldyq saladaǵy ekijaqty yntymaqtastyqty tereńdetý sheńberinde Qazaqstan-Túrikmenstan konsýltatsııalary ótti. Vıdeokonferentsııa formatyndaǵy kezdesýge eki eldiń dıplomatııalyq ókildikteriniń basshylary men quzyretti mekemeler ókilderi qatysty, dep habarlaıdy QazAqparat.

Kelissózder barysynda taraptar shart-quqyqtyq bazany damytý, atap aıtqanda, eki el azamattarynyń shekaradan ótý tártibi, qandastardyń Qazaqstanǵa qonys aýdarýy, konsýldyq alymdardyń ólshemin ýnıfıkatsııalaý jáne kólik quraldarynyń júrgizýshilerine vızalar berý máseleleri talqylandy.

Sonymen birge, azamattardyń quqyqtary men múddelerin qorǵaý salasyndaǵy ekijaqty yntymaqtastyqty keńeıtý boıynsha kelissózder júrgizildi.

Konsýltatsııalardyń nátıjesi boıynsha taraptar konsýldyq baılanystardyń barlyq baǵyttary boıynsha yntymaqtastyqty odan ári damytýǵa daıyndyǵyn rastady.