Qandastardyń tarıhı otanyna dúnıe-múlkimen kóship kelýi máselesin sheshýimiz kerek - Bektaev
«Ulttyq qundylyqtarymyzdy saqtap, ony kúsheıtýge, sonymen qatar demografııamyzdyń kúrt ósýine arqaý bolatyn qandastarymyz! Táýelsizdik alǵaly beri tarıhı otanyna 1 mln 200 myń aǵaıyn kóship kelgen bolsa, olardyń qazirgi sany 3 mıllıonǵa jýyq. Búginde bul úlken áleýmet. Olardyń qoǵamǵa da, mádenıetke de, tipti aýyl sharýashylyǵyna da sińirgen eńbegi zor», - dedi ol partııanyń kezekten tys XVIII sezinde.
Alaıda, Álı Bektaev beıresmı derekterge sáıkes syrtta áli 7,5 mln qandasymyz júrgendigin aıtady.
«Ókinishtisi, olardyń Qazaqstanǵa kóship kelý úderisi sońǵy on jylda kúrt azaıǵan. Sebebi 2010 jyldan bastap memlekettik qoldaý tetikteri toqtatyldy. 2017 jyldan beri qonys aýdarý kvotasy paıda boldy. Dese de nátıje nólge teń. Osy máseleni qolǵa alý kerek dep sanaımyz. Sonymen qatar, qandastar kóshin qaıta jandandyrý úshin dıplomatııalyq mıssııa quzyrly organdarmen birge etnıkalyq qazaqtardyń tarıhı otanyna qonys aýdarýy kezinde mal, tehnıka tárizdi jyljymaly múlikterin ózderimen alyp kelýi máselesin sheshýi tıis», - dedi «Aýyl» partııasynyń tóraǵasy.