Qandastardy qabyldaý tetigi qaıta qaralady - Tamara Dúısenova

ASTANA. QazAqparat – Qandastarǵa 10 jyldyq jeńildetilgen vıza rásimdep, Qazaqstanda óz kásibin júrgizýge múmkindik beriledi. Bul týraly Májilistegi Úkimet saǵatynda QR Áleýmettik kodeksiniń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Shetelde turatyn etnıkalyq qazaqtardyń áleýetin paıdalaný baǵytynda «Atameken kartasyn» (AQSh Grın kartasyna uqsas) engizý usynylady. Ol joǵary deńgeıdegi kásipqoı nemese ózderi turatyn elderde tabysty bıznes-keısterdi iske asyrǵan jáne olardy Qazaqstanda júzege asyrýdy yqylasty etnıkalyq qazaqtarǵa beriletin bolady. Mundaı azamattar merzimi 10 jylǵa deıin sozylatyn jeńildetilgen vıza rásimdep, Qazaqstanda turyp, óz kásibin júrgizýge múmkindik alady», - dedi T. Dúısenova.

Sonymen qatar mınıstr qandastardy qabyldaý tetigi de qaıta qaralatynyn aıtty.

«Qandastardy qonystandyrý saıasatyn eldiń demografııalyq jáne ekonomıkalyq úrdisterin eskere otyryp, olardy qujattardy qabyldaýdyń bastapqy kezeńinde qonystandyrý óńirlerine kóship-qonýdy qosymsha yntalandyra otyryp túbegeıli reformalaý usynylady», - dedi vedomstvo basshysy.

Budan buryn habarlanǵandaı, Qazaqstan ǵalymdardy jeńildetilgen tártiptegi vızalar arqyly kirgizedi.