Qandastardy qoldaý tásilderi jańarady

ASTANA. KAZINFORM — Otanǵa oralǵan qandastardy halyq az ornalasqan jáne eńbek kúshi tapshy óńirlerge ornalastyrýǵa basymdyq beriledi. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti. 

— Etnıkalyq repatrıatsııa ınstıtýtyn damytý kontekstinde qandas mártebesin berý, tirkeý jáne qoldaý boıynsha, onyń ishinde «Qandas» tsıfrlyq platformasy arqyly qoldaý kórsetý tásilderin qaıta qaraý mindeti tur. Jańa mindet qandastardy jumys kúshi tapshy óńirlerge qonystandyrý erekshelikterin eskere otyryp ázirlenedi, — dedi Svetlana Jaqypova Úkimet otyrysynda.

Sondaı-aq mınıstr otanǵa oralǵan qandastardy halqy az aımaqtarǵa ornalastyrý josparda baryn aıtty.

— Qandastarmen keri baılanys tetikterin paıdalana otyryp, beıimdeý sharalaryn (turǵyn úı, bilim berý, tildik ıntegratsııa, kásiptik baǵdar berý) odan ári jetildirý jáne ıntegratsııanyń tabystylyǵyn baqylaý qarastyrylǵan. Sheteldik mekemeler men «Otandastar» qorynyń, sondaı-aq túrli dıasporalardyń kómegimen «Migration.enbek.kz» kóshi-qon platformasy aıasynda shetelde turatyn qazaqtardyń tizimi ázirlenip, engiziledi, — dep tolyqtyrdy vedomstvo basshysy.

Bıyl mamyrda qandas mártebesin berý tártibi qaıta qaralatyny týraly habarlaǵan edik. 

Aıta keteıik, qandas mártebesin alǵan otandastarymyzdyń 17%-y joǵary bilimdi.