Qandastar úshin daıyndyq kýrsy ashylyp, 1 myń grant bólindi

NUR-SULTAN. QazAqparat – 2019-2020 oqý jylynda atalmysh kýrsqa memleket tarapynan etnıkalyq qazaqtar úshin 1000 oryndyq grant bólindi. Sondaı-aq, shetelden kelgen qandastarymyz úshin arnaıy daıyndyq kýrstary jumys isteı bastady, dep habarlaıdy QazAqparat.

«Sheteldegi qazaqtardy atamekenge shaqyrýdyń túrli múmkindikteri bar. Sonyń bir joly - jas qandastarymyzdy elimizdegi joǵarǵy oqý oryndaryna tartý. Bul arada biz negizinen Ózbekstan, Reseı, Iran, Mońǵolııa, Qytaı elderine erekshe mán beremiz. Óıtkeni, bul elderdegi bilim deńgeıi bizdikinen joǵary emes. Sondyqtan olardy jeńildikter jasaý arqyly ózimizge tartýǵa bolady. «Otandastar qorynyń» qoldaýymen shetten keletin jastarǵa arnap daıyndyq kýrsy ashyldy», - dep jazdy «Otandastar qory» AQ birinshi vıtse-prezıdenti Talǵat Adýov óziniń Facebook paraqshasynda.

Onyń aıtýynsha, 2019-2020 oqý jylynda atalmysh kýrsqa memleket tarapynan etnıkalyq qazaqtar úshin 1000 oryndyq grant bólindi.

«Alaıda, kelgen qandastarymyzdyń sany 1238-ge jetti. Grantpen qamtamasyz etilmeı qalǵan jastar máselesin Úkimet otyrysyna deıin kóterip, bilim jáne ǵylym mınıstrliginiń qoldaýymen barlyǵyn túgel tegin oqýǵa ornalastyrdyq. Óz kúshimen JOO-na shamamen 1500 jas, kolledjderge 700-deı talapker tústi. Jalpy Qazaqstanǵa kelip bilim alýshy qandastarymyzdyń sany 20 myńnan asty. Sonyń negizgi bóligi kórshi Ózbekstannan keldi. Olardyń arasynda Ózbekstandaǵy qazaq mádenı ortalyǵy belsendi jumys istedi. Bıyl osy elden Qazaqstanǵa oqýǵa túsýge keletin jastar sanyn taǵy ósirý kózdelip otyr», - deıdi ol.

Sondaı-aq, vıtse-prezıdent kórshi ózbek elindegi qazaq mádenı ortalyǵynyń ókilderimen kezdesip, atalǵan máselelerdi talqyǵa salǵanyn alǵa tartty.