Qandastar ulttyq sport oıyndaryn tamashalady
Astanada ótetin «Otandastar» forýmyna kelgen qandastar ulttyq sport oıyndaryn tamashalady, dep habarlaıdy Kazinform.
Erteń bastalatyn forýmǵa sheteldegi 200-ge jýyq qazaq uıymdarynyń basshysy, belsendi jáne tanymal tulǵalar, otandyq ǵylym, bilim, mádenıet, sport, bıznes, medıa, saıasat, qoǵamdyq uıymdar jáne basqa da salalardyń kórnekti ókilderi men belgili qaı̆ratkerleri kelgen bolatyn.
Osyǵan oraı, búgin forýmnyń Bas seriktesi «Altyn Qyran Foundation» qoǵamdyq qory jáne Ulttyq sport qaýymdastyǵy uıymdastyryp jatqan mádenı baǵdarlama aıasynda shetelden kelgen qandastar ulttyq qundylyqtarymyzben tanysty. Atap aıtqanda, Ulttyq sport qaýymdastyǵy men Salalyq sport federatsııalarynyń mamandary qusbegilik, qolóner sheberligi, ulttyq oıyndarymyzdan toǵyzqumalaq, asyq atý, sadaq atý, qyz qýý, aýdaryspaq jáne kókpar tartýdan qoıylym kórsetti.
«Ár qazaq meniń jalǵyzym» degen uranmen shettegi qazaqtyń bárin shaqyrǵymyz keledi. Sizder sol sheteldegi qazaq úshin eńbek etip júrgen tulǵalarsyzdar. Árqaısylaryńyz ózderińizdiń salalaryńyz boıynsha jetistikke jetip, qazaqtyń atyn shyǵaryp júrsizder. Turyp jatqan elderińiz ben Qazaqstan arasynda altyn kópir bolyp otyrsyzdar. Sondyqtan sizderdi arnaıy shaqyrdyq. «Otandastar» forýmy Astanada osymen ekinshi ret ótekeli tur. Budan buryn 2019 jyly bolǵan. Bıylǵy forýmnyń aldynǵy forýmnan ereksheligi – kelgen qandastarymyzdyń sanynda. Buǵan deıingi forýmǵa 100 delegat kelse, bıylǵysyna 40 elden 200 delegat keldi, - dedi «Otandastar Qorynyń» prezıdenti Abzal Saparbekuly.
Forýmnyń maqsaty – sheteldegi qazaq uıymdarymen ózara yntymaqtastyq máselelerin talqylaý; elimizdiń jańa kezeńdegi memlekettik saıasatymen jáne saıası-ekonomıkalyq reformalarymen, ulttyq rýhanııatqa qatysty zamanaýı trendtermen tanystyrý, sheteldegi qazaqtardy qoldaýda elimizdiń júrgizip otyrǵan saıasaty, sheteldegi qazaq jastaryn Qazaqstanda sapaly bilim alý jáne óz qabiletterin iske asyrý, elge kóship keletin qandastarǵa memleket tarapynan qabyldanyp jatqan qoldaý sharalary týraly aqparattandyrý.
«Búgin dúnıe júzinen kelgen qandastarymyzdy ulttyq aspaptarymyzben jáne sport túrlerimen tanystyryp jatyrmyz. Ulttyq sportymyzdy kórsin, qazaqtyń salt-dástúrimen tanyssyn degen nıet. Bul oıyndarda qazaqtyń tarıhy, namysy, rýhy bar. Alla buıyrsa 2024 jyly Qazaqstanda Dúnıejúzilik kóshpendiler oıyny ótedi. Ol biz úshin mártebe ári úlken jaýapkershilik. Memleket basshysynyń qoldaýynyń arqasynda ulttyq sportymyz jaqsy damyp keledi. Kelesi jyly kóshpendiler oıynyna 100 memleketten 3 myńnan astam sportshy, týrıst keledi dep kútilýde. Biz osy qandastarymyzdy da shaqyramyz. Olar arqyly basqa da týrısterdi tartyp, ózimizdiń ulttyq sport túrlerin álemge tanystyrǵymyz keledi, - dedi Ulttyq sport qaýymdastyǵynyń vıtse-prezıdenti Tastanbek Esentaev.
Forým aıasynda «El damýyndaǵy qandastardyń róli», «Otandastardyń ıntellektýaldyq áleýeti – ulttyq qundylyqtardy ilgeriletý draıveri», «XXI ǵasyrdaǵy qazaq tili jáne búgingi múmkindikteri», «Medıa jáne zamanaýı trendter» taqyryptary boıynsha sessııalar jáne «Otandastar Qory» KeAQ jańa jobalarynyń tusaýkeseri men «Taıqazan» forýmnyń qorytyndy sessııasynda ótedi.
Aıta keteıik, buǵan deıin sheteldegi 200 qazaq uıymynyń jetekshisi elimizde bas qosqanyn jazǵan bolatynbyz.
