Qandastar óńirlik kvotaǵa ótinishti eGov.kz pen eGov mobile arqyly bere alady
«Biz úshin memlekettik qyzmetter Qazaqstannyń barlyq azamattary men turǵyndary úshin yńǵaıly jáne qoljetimdi bolýy mańyzdy. Búgingi tańda bizdiń elimizde qandastar men qonys aýdarýshylar úshin memlekettik qoldaý sharalary kóptep jasalyp jatyr. Endi olar óńirlik kvotaǵa engizýge ótinimdi HQKO men basqa mekemelerge barmaı-aq, eGov.kz portaly men eGov mobile mobıldi qosymshasy arqyly elektrondy túrde bere alady», - dep atap ótti «Ulttyq aqparattyq tehnologııalar» AQ Basqarma Tóraǵasy Rostıslav Konıashkın.
Jańa qyzmetti eGov.kz portalynda «Azamattarǵa» - «Azamattyq, mıgratsııa jáne ımmıgratsııa» bóliminen tabýǵa bolady. Dál osy qyzmet eGov Mobile mobıldi qosymshasyndaǵy «Qyzmetter» - «Jeńildikter, járdemaqylar jáne zeınetaqylar» bóliminde ornalastyrylǵan.
Ótinim berý úshin paıdalanýshyǵa:
- derbes derekterdi paıdalanýǵa kelisimdi rastaý kerek;
- kvota beretin aımaqty tańdaý qajet;
- ótinish berýshi týraly málimetterdi toltyrý kerek;
- qazaq jáne orys tilderinde notarıaldy kýálandyrylǵan aýdarmasymen pasporttyń kóshirmesi engizý kerek;
- neke nemese nekeni buzý týraly kýáliktiń kóshirmelerin (bar bolsa) qosý;
- belgili bir mamandyq boıynsha bilimin, biliktiligin jáne jumys tájirıbesin rastaıtyn qujattardyń kóshirmelerin qosý;
- ótinishke bir rettik parolmen nemese ETsQ arqyly qol qoıý.
Qyzmet nátıjesi qandastardy qabyldaýdyń óńirlik kvotasyna engizý týraly sheshim nemese bas tartý týraly jaýap túrinde Jeke kabınette 14 jumys kúni ishinde paıda bolady.
Qyzmet iske qosylǵan sátten bastap 272 adam eGov.kz portaly arqyly óńirlik kvota alýǵa ótinish bergen.
Óńirlik kvota qandastardy Aqmola, Shyǵys Qazaqstan, Batys Qazaqstan, Qostanaı, Pavlodar jáne Soltústik Qazaqstan men Abaı oblystaryna qonystandyrý úshin QR Úkimeti aıqyndaǵan óńirlerge bólinedi.
Bul rette óńirlik kvotaǵa engizilgen qandastarǵa kóshýge sýbsıdııalar (otbasynyń árbir múshesine 70 AEK-ten birjolǵy tólem) jáne 12 aı ishinde jaldaý jáne kommýnaldyq qyzmetterdi tóleý shyǵyndaryn jabýǵa (bir otbasyna 15-ten 30 AEK-ke deıingi mólsherde) memlekettik qoldaý sharalary qoljetimdi.
Sonymen qatar, qandas mártebesin alǵan etnıkalyq qazaq myna qyzmetterge qol jetkize alady:
- el aýmaǵyna kirgen kezde kólik quraldaryn qosa alǵanda, jeke paıdalanýǵa arnalǵan múlikke kedendik tólemderdi tóleýden bosatý;
- qandastardy beıimdeý jáne ıntegratsııalaý ortalyqtarynda tegin beıimdelý jáne ıntegratsııalyq qyzmettermen qamtamasyz etý;
- tehnıkalyq jáne kásiptik, orta bilimnen keıingi jáne joǵary bilimniń oqý uıymdaryna túsýge kvotalar sheńberinde bilim alý (Qazaqstan Respýblıkasynda azamattyǵy ulty qazaq adamdar úshin kvota 4% mólsherinde belgilengen);
- Qazaqstan azamattarymen teń dárejede jumyspen qamtýǵa járdemdesý jónindegi sharalarmen qamtamasyz etý;
- memlekettik turǵyn úı qorynan baspana alýǵa ótinish berý múmkindigi.
Budan basqa, 2023 jylǵy naýryzdan bastap turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin birjolǵy óteýsiz jáne qaıtarymsyz negizde turǵyn úı qunynyń 50%-y nemese bir otbasyna 4 mln teńgege deıin mólsherinde ekonomıkalyq utqyrlyq sertıfıkaty engizildi.
