Qandastar elimizdiń JOO-laryna UBT-syz qalaı túse alady
«Zańnamaǵa sáıkes bilim berý granttary Ulttyq biryńǵaı testileýdiń (budan ári – UBT) nátıjelerine sáıkes bilim berý baǵdarlamalarynyń naqty toptary boıynsha konkýrs negizinde beriledi. Búgingi kúni qandastar úshin memlekettik bilim berý tapsyrysynyń jalpy kóleminiń 4 paıyzyy (2265 grant) mólsherinde joǵary oqý oryndaryna túsý úshin qabyldaý kvotasy kózdelgen. Osy kvota aıasynda 2012 jyldan bastap 2021 jylǵa deıin 8 000-nan astam qandas qabyldandy. 2020 jyldan bastap joǵary bilimge qoljetimdilikti keńeıtý maqsatynda qandastar úshin UBT alǵash ret elektrondy formatta uıymdastyryldy. Ol testileýdi qashyqtan shetelde tapsyrýǵa múmkindik berdi», - dep atap ótedi vıtse-premer jaýabynda.
Onyń dereginshe, bıyl onlaın testileýge 1 143 qandas qatysty, 796 qandas nemese UBT-ǵa qatysýshylardyń jalpy sanynyń 69 paıyzy bilim grantyn aldy. Ótken jyly bul kórsetkish 76 paıyz deńgeıinde boldy
«2020 jyldan bastap SAT, AST jáne IB halyqaralyq standarttalǵan testileriniń baldaryn UBT baldaryna aýystyrý engizildi. Atalǵan sertıfıkattary bar adamdar UBT tapsyrýdan bosatylady. Tıisinshe, standarttalǵan test sertıfıkattary bolǵan jaǵdaıda qandastar JOO-ǵa UBT-syz túsýge múmkindigi bar», - dedi ol.
Eraly Toǵjanov 2020 jyldan bastap dıaspora ókilderi UBT tapsyrmaı JOO-ǵa daıyndyq bólimderine qabyldaýdyń bekitilgen qaǵıdalaryna sáıkes áńgimelesý nátıjeleri boıynsha qabyldanatyndyǵyn atap ótedi.
«Jyl saıyn joǵary oqý oryndarynyń daıyndyq bólimderine memlekettik stıpendııamen jáne jataqhanalardaǵy oryndarmen qamtamasyz ete otyryp, Qytaı, Ózbekstan, Mońǵolııa, Reseı, Tájikstan jáne Túrkimenstannan 1000-nan astam qandas qabyldanady. Daıyndyq bóliminiń baǵdarlamasy boıynsha qandastar qazaq tilin, jalpy bilim berý pánderin oqıdy, UBT-ǵa tolyqqandy daıyndyq kýrsynan ótedi», - dedi Úkimet basshysynyń orynbasary.
