Qandastar arasynda shaǵyn fýtboldan týrnır ótti

NUR-SULTAN. QazAqparat - Qazaqstan Táýelsizdiginiń 30 jyldyǵyna oraı Nur-Sultan qalasynda elge oralǵan qandastar arasynda shaǵyn fýtboldan respýblıkalyq týrnır ótti, dep habarlaıdy QazAqparat tilshisi.

5G CYBER SPORT klýby uıymdastaryǵan týrnırge elimizdiń 12 oblysynda turyp jatqan qandastarymyz bir-bir komanda daıyndap, 12 komanda ózara myqtyny anyqtady.

Nátıjesinde birinshi oryndy almatylyq «Birlik kerýen» komandasy qanjyǵasyna baılady. Ekinshi orynǵa astanalyq «5G CYBER ARENA» komandasy ıe bolsa, úzdik úshinshi oryndy taǵy bir Almatydan kelgen «Baq ASMAR» komandasy jeńip aldy.

Jeńimpaz komandalar tıisinshe, kýboktarmen qatar 500 myń, 300 myń jáne 150 myń teńge kóleminde aqshalaı syıaqyǵa ıe boldy.

Jarys sońynda jeńimpaz komandalardy marapattaý sátinde «5G CYBER ARENA» klýbynyń dırektory Talǵat Lázzat bul týrnırdiń basty maqsaty men mańyzyna toqtalyp ótti.

«Mine, bıyl elimizdiń Táýelsizdigine 30 jyl! El bolyp osy aıtýly merekeni toılap jatyr. Osy qysqa ýaqytta elimizge shet elderde turatyn mıllıondaı qandasymyz kelip oraldy. Bizdiń búgingi jarysymyzdyń basty maqsaty - osy Táýelsizdiktiń 30 jyldyǵyn atap ótý. Táýelsizdiktiń qadir qasıetin bilý. Sondaı-aq, salaýatty ómir saltyn ustanyp, jastarymyzǵa sportpen shuǵyldanýdy nasıhattaý», - dep atap ótti ol.