Qandasymyz Dýbaıda ótken halyqaralyq festıvalden júldeli oraldy – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Toqaev sý tasqyny jaıly málimdeme jasady - TRT
Qazaqstan prezıdenti Qasym-Jomart Toqaev bılikke sý tasqynynan keıin jańa turǵyn úı salýǵa, ótemaqy tóleýge jáne ınfraqurylymdy jóndeýge bes aı ýaqyt bar ekenin aıtty.
Bul týraly apta sońynda Túrkııa Radıo Televızııa portaly da habarlady.
«Toqaev Qazaqstan halqy Assambleıasyna sóılegen sózinde «Bizdiń apatty ortaq jeńýimiz kópke sozylmaıdy. Sýdyń kóp bóligi tartylǵan soń, buzylǵan aýmaqtardy qalpyna keltirý jumystary bastalady. Eń aldymen, azamattarymyzdyń shyǵyny óteledi, turǵyn úı qurylysy bastalady, páterler bólinedi, qıraǵan ınfraqurylymdar jóndeledi. Biz osy jan-jaqty zertteýlerge qysqa ýaqyt bóldik. Birge qol jetkize alatynymyzǵa senimdimin» dedi», - dep jazdy túrkııalyq basylym.
«TRT» basylymy Toqaevtyń málimetine súıene otyryp, bastalatyn keshendi qurylys jumystary azamattar úshin jańa múmkindikter týdyratynyn, sonymen qatar azamattar ekonomıkalyq áleýeti joǵary jáne ekologııalyq jaǵdaıy jaqsy eldi mekenderge kóshe alatynyn da tilge tıek etken.
Qandasymyz Dýbaıda ótken halyqaralyq festıvalden júldeli oraldy – «Janadauir»
Jaqynda Baıan-Ólgıı aımaǵyndaǵy Qurmanhan Muqamádıuly atyndaǵy mýzykaly drama teatrynyń bıshisi Laýra Nábıkárimqyzy «DUBAI GRANT FESTIVAL» halyqaralyq saıysyna qatysyp, kıim jáne mımıka túrinen júldeger atandy. Osyndaı erekshe nomınatsııany jeńip alý úshin Laýra eki jyldaı daıyndyq jasaǵan, dep habarlaıdy «Jańa dáýir» basylymy.
Mońǵolııalyq BAQ-tyń dereginshe, teatr bıshisi Laýra Qazaqstan Respýblıkasy, Abaı atyndaǵy pedagogıkalyq ýnıvesıtetiniń «Mýzykalyq bilim jáne horeografııa» kafedrasynan bıshilik mamandyǵy boıynsha oqyp bitirgen eken. Laýra Nábıkárimqyzy etıka men estetıkasy úılesken qazaq bıin sahnalaý arqyly Dýbaı qalasynda kórermenderdiń ystyq yqylasy men qazylar alqasynyń joǵary baǵasyn alǵan. Bul saıysqa qatysý úshin aldymen Dýbaıǵa ótinish joldap, onymen qosa bıdiń vıdeosyn júktegen. Konkýrsty uıymdastyrý komıssııasynyń oń baǵasyn alǵan bıshiler Dýbaıǵa shaqyrtý alyp, saıysqa qatysqan.
Mońǵolııalyq BAQ-tyń málimetinshe, atalǵan halyqaralyq saıysqa 18 eldiń kil myqty bıshileri qatysqan. Ár eldiń bıi árqalaı. Bir-birinen alatyn dúnıeleri de kóp. Bul jolǵy bı negizinen ár halyqtyń ulttyq ereksheligin kórsetedi. Qazaq halqynyń bıi óte názik. Festıvalde Laýranyń kostıými bılegen kezde kıgen kóılegi erekshe baǵa alǵan.
Sondaı-aq ol atalmysh saıysqa qatysyp ǵana qoımaı óziniń kishkentaı shákirtterin Qazaq eliniń Almaty qalasynda ótken «ZHULDIZ ART KAZAKHSTAN» baıqaýyna qatystyryp, top bımen birinshi oryn, jeke bımen gran prı jeńip alyp, Ystyq kól, Tashkent, Stambýl qalalaryna joldama alǵan.
Qazirgi ýaqytta Laýra jetekshilik etetin «Kids Balet» úıirmesi klassıkalyq bı, balet túrleri boıynsha búldirshinderge bıden maǵlumat berip baýlýda.
«Bı degenimiz – asa joǵary qundylyǵy bar óner. Onyń adam densaýlyǵy men sulýlyǵyna, adamnyń kóńil kúıine áser óte jaqsy. Qazirgi tańda ata-analardyń kópshiligi bıdiń mańyzdylyǵyna, balalarynyń saý bolyp ósýine qatty kóńil bólip, bı úıirmelerine kóptep berip jatyr. Laýra bıshimiz shákirt qabyldap, bı úıretýge árqashan ázirmin deıdi. Qazirdiń ózinde Laýranyń bı úıirmesine tizimdelip jatqan búldirshinder kóp», - dep túıindeıdi «Jańa dáýir» basylymy.
«Qorǵas» halyqaralyq shekara yntymaqtastyǵy ortalyǵyna mıllıonnan astam adam kelgen – «Halyq gazeti»
Sáýir aıynan bastap, aýa raıynyń qolaılylyǵyna oraı, Shyńjańdaǵy Іle Qazaq avtonomııalyq oblysy Qorǵas qalasyndaǵy Qytaı-Qazaqstan «Qorǵas» Halyqaralyq Shekara yntymaqtastyǵy ortalyǵynda shekara týrısteriniń, transshekaralyq jáne saýda týrısteriniń eń joǵary aǵyny bastaldy, dep habarlaıdy Qytaıdyń «Halyq gazeti».
Atalǵan basylymnyń dereginshe, Qorǵastyń kirip-shyǵý shekara beketiniń statıstıkasyna sáıkes, sáýir aıynan bastap Qytaı-Qazaqstan «Qorǵas» Halyqaralyq Shekara yntymaqtastyǵy ortalyǵy kún saıyn 12000-nan astam adamdy qabyldaıdy. Eń joǵary kórsetkish bir kúnde 19000-nan asqan. 19 sáýirdegi jaǵdaı boıynsha 2024 jyly ortalyqqa 1,34 mıllıonnan astam adam kirip-shyqqan.
QazUÝ oqytýshylary men stýdentteri Ulttyq kitaphanada ótken sharaǵa qatysty - Parstoday
23 sáýirde Qazaqstan Respýblıkasynyń Ulttyq kitaphanasynda álemniń júzden astam elinde mıllıondaǵan adam atap ótetin Dúnıejúzilik kitap jáne avtorlyq quqyq kúnine arnalǵan jyl saıynǵy «KitapShoý-2024» kitap festıvali ótti.
Festıvaldiń maqsaty – oqý belsendiligin arttyrý, kitap oqýdy qoldaý, kórkem ádebıetke degen qyzyǵýshylyqty oıatý, jeke tulǵanyń aqparattyq saýattylyǵyn jáne oqý mádenıetin qalyptastyrý.
Bul týraly osy aptada Irannyń «Parstoday» aqparat agenttigi de habarlady.
Atalǵan basylymnyń keltirgen málimetine súıensek, kitaphananyń óner zalynda Almatydaǵy Iran Islam Respýblıkasynyń Bas konsýldyǵy jáne Iran mádenı ortalyǵymen birlesip ótkizgen «Qazaqstan – Iran: «Naýryznama – mádenıetter úndestigi» atty ádebı-taqyryptyq kesh ótken. Taıaý Shyǵys jáne Ońtústik Azııa kafedrasy meńgerýshisi D.M.Kókeeva jáne ırantaný bóliminiń oqytýshylary men stýdentteri osy atalǵan sharaǵa qatysqan.
«Parstoday»-diń dereginshe, bul shara Iran Islam Respýblıkasynyń Almatydaǵy Bas konsýly Mohsen Faǵanı myrza quttyqtaý sózimen ashylǵan. Sharada Almatydaǵy Irannyń Bas konsýldyǵy janyndaǵy Iran mádenı ortalyǵynyń dırektory Hoseın Aǵazade, M.Áýezov atyndaǵy Ádebıet jáne óner ınstıtýty dırektorynyń orynbasary T.E.Qydyr, ırantaný bóliminiń meńgerýshisi A.Boranbaeva, ırantaný bóliminiń aǵa oqytýshysy, f.ǵ.k. Ǵ.Qambarbekova sóz sóıledi.
Qazaqstan elshiligi Ózbekstan Úkimetine alǵysyn bildirdi - «ÓzA»
23 sáýir kúni Ózbekstan men Qazaqstan Prezıdenti telefon arqyly sóılesip, onda Ózbekstan basshysy Shavkat Mırzıeev Qazaqstan basshysy Qasym-Jomart Toqaevqa eldegi bolyp jatqan qıyn jaǵdaıǵa oraı kóńil aıtyp, eki el arasyndaǵy tatý kórshilik, strategııalyq seriktestik jáne odaqtastyq qarym-qatynastardy odan ári keńeıtýdiń ózekti máselelerin talqylaǵan edi.
Bul týraly osy aptada ózbekstandyq «ÓzA» aqparattyq agenttigi habarlady. Atalǵan BAQ-tyń dereginshe, Óz kezeginde Qazaqstannyń Tashkenttegi elshiligi Ózbekstan halqy men basshylyǵyna alǵys bildirgen málimdeme jasady.
«Elshilik Qazaqstan Prezıdenti Qasym-Jomart Toqaevtyń alǵys sózderine qosyla turyp, Ózbekstan Prezıdentiniń ákimshiligi men úkimetine odaqtas retinde kórsetken qoldaýy úshin jáne ózbek halqynyń jan dúnıesiniń keńdigi úshin alǵysyn bildiredi», - delingen habarlamada.
Eske sala keteıik, Ózbekstan Prezıdentiniń tapsyrmasyna sáıkes el Úkimeti Qazaqstandaǵy sý tasqynynan zardap shekken halyqqa gýmanıtarlyq kómek jóneltken edi. Sondaı-aq osy aptada «ÓzA»-da «Ózbekstannyń turaqty turǵyndarynyń sany 37 mıllıonǵa jetti» degen taqyryptaǵy aqparat jarııalandy.
Ózbekstandyq basylymnyń keltirgen deregine súıensek, 2024 jyl 22 sáýir saǵat 03:24 jaǵdaı boıynsha respýblıkanyń turaqty turǵyndarynyń sany 37 mln adamdy quraǵan. Statıstıka agenttiginiń málimetinshe, erler sany – 18,5 mıllıon, áıelder sany – 18,3 mıllıon.
«2024 jyl 1 sáýirdegi jaǵdaı boıynsha respýblıkanyń turaqty turǵyndarynyń sany 36 963 262 adamdy quraǵan edi. Aıta keter taǵy bir jaıt, 1 qańtardaǵy jaǵdaı boıynsha Ózbekstanda 1 sharshy shaqyrym jerge turaqty turǵyndardyń ortasha sany 82 kisige sáıkes keledi», - dep jazady «ÓzA».