«Qandas» mártebesin qalaı úıden shyqpaı-aq alýǵa bolady
ASTANA. KAZINFORM — Kóshi-qon salasyndaǵy birqatar qyzmetti migration.enbek.kz kóshi-qon protsesteri portaly arqyly onlaın alýǵa bolady. Portal Qazaqstan azamattary, etnıkalyq qazaqtar, shetel azamattary, jumys berýshiler men ınvestorlarǵa arnalǵan qyzmetterdi bir platformada usynady.
Bul jerde «qandas» mártebesin alý, qandastardy qabyldaýdyń óńirlik kvotasyna engizý, eńbek ımmıgranttaryna jumys isteýge ruqsat rásimdeý, sheteldik jumys kúshin tartý jáne taǵy basqa da qyzmetter qoljetimdi.
Portaldyń basty artyqshylyǵy barlyq negizgi rásimderdi onlaın oryndaýǵa bolady: tirkelip, jeke derekterdi toltyrýǵa, ótinish berýge jáne onyń mártebesin jeke kabınetten baqylaýǵa múmkindik bar.
Tirkelý — qyzmet alýdyń alǵashqy qadamy
Áýeli migration.enbek.kz saıtyna kirip, «Kirý» batyrmasynda «Tirkelý» qajet.
Ol úshin elektrondyq poshtasyn jáne qupııasózin engizip, paıdalanýshy kelisiminiń sharttaryn qabyldaý jáne eseptik jazba ashý kerek. Odan keıin kórsetilgen elektrondyq poshtaǵa tirkelýdi rastaý týraly hat keledi.
Portalda paıdalanýshylardyń birneshe sanaty qarastyrylǵan. Sondyqtan qoljetimdi qyzmetter men qajetti málimetter paıdalanýshy tańdaǵan sanatqa baılanysty bolady.
Jeke kabınet: qajetti aqparattardyń barlyǵy bir jerde
Portalǵa kirgennen keıin paıdalanýshy jeke kabınetke ótedi. Qyzmet almas buryn «Jeke derekter» bólimin toltyrý qajet.
Eger shetel azamatynyń JSN-i bolsa, ol týraly keıbir málimet memlekettik aqparattyq júıelerden avtomatty túrde alynýy múmkin. Qalǵan qajetti derekterdi paıdalanýshy ózi engizedi. Málimetterdi saqtamas buryn olardyń durystyǵyn muqııat tekserý kerek.
Jeke málimetterdi engizgen soń, paıdalanýshy ózine qajetti qyzmetti tańdap, elektrondyq ótinish formasyn toltyryp, ony qaraýǵa joldaı alady.
Jeke kabınette ótinishtiń mártebesin baqylap, tıisti habarlamalardy alýǵa bolady. Bul qyzmettiń qalaı kórsetilip jatqanyn qosymsha suraý salmaı-aq qadaǵalaýǵa múmkindik beredi.
Ótinish jibermes buryn derekter men qujattardy tekserińiz
Ótinishti jiberer aldynda engizilgen málimetterdiń durystyǵyn tekserý mańyzdy.
Jeke málimetterdiń sáıkestigine, mindetti bólimderdiń tolyqtyǵyna jáne qajetti qujattardyń engizilgenine kóz jetkizý kerek.
Júıe mindetti uıashyqtyń toltyrylýyn da tekseredi. Qajetti málimetter tolyq engizilmegen jaǵdaıda, paıdalanýshyǵa eskertý kórsetilip, derekterdi tolyqtyrmaı turyp saqtaýǵa múmkindik berilmeıdi.
Ár qyzmettiń talaptary men qajetti qujattar tizimi ártúrli. Sondyqtan ótinish bermes buryn tańdalǵan qyzmettiń sıpattamasy men ony alý sharttarymen tanysý usynylady.
Habarlamalardy tekserip otyryńyz
Ótinish jiberilgen soń onyń qaralý kezeńderine qatysty aqparat jeke kabınette qoljetimdi bolady. Sondyqtan paıdalanýshy ótinish mártebesin únemi qadaǵalap, júıedegi habarlamalarmen tanysyp otyrýy qajet. Bul rásimdeý barysyndaǵy ózgeristerdi der kezinde bilip, qajet bolǵan jaǵdaıda qosymsha áreketterdi oryndaýǵa kómektesedi.
Sonymen qatar portalda qoljetimdi qyzmetter týraly, kóshi-qon jáne jumysqa ornalasý salasyndaǵy resmı derekkózderden alynǵan aqparattar jarııalanyp otyrady.
Migration.enbek.kz — kóshi-qon salasyndaǵy qyzmetterdi alýǵa arnalǵan biryńǵaı tsıfrlyq portal. Onyń kómegimen tirkelý jáne jeke derekterdi toltyrýdan bastap, ótinish berip, nátıjesin baqylaýǵa deıingi negizgi kezeńderden onlaın ótýge bolady.
