Qandas mártebesin qalaı alýǵa bolady: elge kóshýdiń 9 kezeńi
ASTANA. KAZINFORM — Qazaqstanǵa kóship kelýdi josparlaǵan etnıkalyq qazaqtar qandas mártebesin qalaı alady jáne qandaı memlekettik qoldaý kórsetiledi? Eńbek jáne halyqty áleýmettik qorǵaý mınıstrliginiń habarlaýynsha, qonys aýdarý úshin toǵyz kezeńnen ótý qajet. Eń mańyzdy qadamdardy túsindiremiz.
Birinshi qadam – óńirdi tańdaý. Elde qonys aýdarý úshin jeti óńir belgilengen. Aldyn ala turmys jaǵdaılary men jumysqa ornalasý múmkindikterin naqtylap alǵan jón.
Ekinshi qadam – QAZTEST. testcenter.kz saıtynda qazaq tilin bilý deńgeıin anyqtaıtyn testten ótesiz. 60 suraqtan turatyn testtiń ár bólimi, ıaǵnı tyńdalym men oqylym boıynsha keminde 70 paıyz durys jaýap berý kerek.
Úshinshi qadam – saýalnamany toltyrý. Bilimińiz, jumys tájirıbeńiz, kásibı daǵdylaryńyz, tilderdi meńgerý deńgeıińiz, densaýlyq jaǵdaıyńyz jáne otbasy quramy týraly málimetterdi kórsetý kerek. Osy derekter negizinde baldyq baǵalaý, ıaǵnı skorıng júrgiziledi.
Tórtinshi qadam – memlekettik tekserý. Ótinish berýshiniń málimetterin arnaıy jáne quqyq qorǵaý organdary tekseredi.
Besinshi qadam – suhbattasý. Tekserýden keıin úmitkermen suhbattasý ótkizilip, tıisti sheshim qabyldanady.
Altynshy qadam – qandas mártebesin alý. Skorıngten sátti ótkennen keıin qandas mártebesin alý úshin tıisti ótinish berýge bolady.
Jetinshi – memlekettik qoldaý. Óńirlik kvotaǵa engizilgen jaǵdaıda qonys aýdarýǵa, turǵyn úıdi jalǵa alýǵa jáne kommýnaldyq qyzmetterdi tóleýge sýbsıdııalar qarastyrylǵan.
Segizinshi – beıimdelý jáne qoǵamǵa kirigý. Mamandandyrylǵan ortalyqtar qujattardy rásimdeýge, jumysqa ornalasýǵa jáne balalardy bilim berý uıymdaryna ornalastyrýǵa kómektesedi.
Toǵyzynshy – turaqty turýdy rásimdeý. Aldymen Qazaqstanda turaqty turýǵa ruqsat alý qajet. Sodan keıin turýǵa yqtııarhat rásimdeledi.
Qajetti qujattardy aldyn ala daıyndap, barlyq kezeńnen retimen ótińiz.
Eske salaıyq, buǵan deıin «qandas» mártebesin qalaı úıden shyqpaı-aq alýǵa bolatyny jóninde jazǵan edik.
