Qandas mártebesin alatyndar QAZTEST-ti qalaı tapsyrady
ASTANA. KAZINFORM – Qandas mártebesin alýdy nemese Qazaqstanda turaqty turýǵa ruqsat rásimdeýdi josparlaǵan azamattar úshin QAZTEST tapsyrý kóshi-qon áleýetin krıterıaldy baǵalaý kezeńderiniń biri sanalady, dep habarlaıdy QR Eńbek jáne halyqty áleýmettik qorǵaý mınıstrligi.
QAZTEST arqyly úmitkerdiń memlekettik tildi bilý deńgeıi anyqtalady. Vedomstvo málimetinshe, bul qazaq tilin tereń bilýdi talap etetin kúrdeli emtıhan emes. Testileý kúndelikti ómirde qarym-qatynas jasaýǵa jáne Qazaqstandaǵy jańa ortaǵa beıimdelýge qajetti tildik daǵdylardy baǵalaýǵa baǵyttalǵan.
Tapsyrmalar kúndelikti ómirde kezdesetin jaǵdaılar negizinde ázirlengen. Negizgi nazar qazaq tilindegi sózderdi tyńdap túsiný jáne oqylǵan aqparatty qabyldaý qabiletine aýdarylady.
Qatysýshy tyńdalym jáne oqylym baǵyttary boıynsha barlyǵy 60 tapsyrma oryndaıdy. Testileýge 1 saǵat 10 mınýt beriledi jáne ol onlaın formatta ótkiziledi.
– QAZTEST – kóshi-qon áleýetin krıterıaldy baǵalaýdyń jalpy rásimindegi kezeńderdiń biri. Onyń negizgi maqsaty – adamnyń memlekettik tildi kúndelikti ómirde qoldaný deńgeıin jáne qazaq tilinde qarapaıym qarym-qatynas jasaýǵa daıyndyǵyn anyqtaý, – delingen mınıstrlik aqparatynda.
Test formatyna aldyn ala tanysyp, daıyndalǵysy keletin azamattarǵa beıimdeý jáne ıntegratsııa ortalyqtarynda tegin daıyndyq qarastyrylǵan. Onda QAZTEST formaty jóninde keńes alyp, jattyǵý tapsyrmalaryn oryndaýǵa bolady.
Qajetti nátıje kórsete almaǵan jaǵdaıda testi qaıta tapsyrý múmkindigi bar. Sońǵy testileýden keıingi 30 kúntizbelik kún ishinde ony eki retke deıin qaıta tapsyrýǵa ruqsat etiledi.
Testileý proktorıng júıesi arqyly júrgiziletindikten, qatysýshy aldyn ala kamera men mıkrofonnyń durys jumys istep turǵanyn jáne ınternet baılanysynyń turaqtylyǵyn tekserýi qajet.
QAZTEST nátıjesi úsh jumys kúni ishinde beriledi.
Testileý tártibi týraly qosymsha aqparat Testcenter.kz jáne migration.enbek.gov.kz resmı resýrstarynda jarııalanǵan.
Aıta keteıik, eki myńnan astam qandas memlekettik bilim grantyn ıelendi.
