Qandas mártebesin 3 kúnniń ishinde alýǵa bolady

NUR-SULTAN. QazAqparat – «Otandastar» qory elimizge qonys aýdarǵan qandastarǵa kóshi-qon úrdisindegi talaptardy túsindirý maqsatynda daıyndalǵan beınerolık jarııalady, dep habarlaıdy QazAqparat tilshisi.

«Qazaqstan Respýblıkasyna kelgen etnıkalyq qazaqtar qandas mártebesin alý úshin turǵylyqty jeri boıynsha Halyqqa qyzmet kórsetý ortalyǵyna ótinishin bere alady. Qandas mártebesi bir jyl merzimge beriledi jáne Qazaqstan azamattyǵyn alǵan jaǵdaıda toqtatylady», - delingen qordyń Instagram paraqshasynda jarııalanǵan beınerolıkte.

Qordyń túsindirýinshe, qandas mártebesin alý úshin HQO-ǵa erkin nysanda jazylǵan ómirbaıan, jeke basyn kýálandyratyn qujattardyń kóshirmesin, notarıaldy kýálandyrǵan aýdarmasymen, jeke basyn kýálandyratyn qujattarda ulty jazylmaǵan jaǵdaıda ótinish berýshiniń ultyn rastaıtyn basqa da qujattar tapsyrylady.

Qujattardy qaraý jáne qandas mártebesin berý ótinish tirkelgen kúnnen bastap 4 jumys kúni ishinde, eger ótinish berýshiniń jeke sáıkestendirý nómiri bolǵan jaǵdaıda 3 jumys kúni ishinde júzege asyrylady.