Qandas bolýǵa 7 myń ótinish: kóshi-qon kartasyndaǵy jańa úrdis

ASTANA. KAZINFORM — Qazaqstanda qandastar men qonys aýdarýshylardy qabyldaýǵa arnalǵan Migration.enbek.kz portaly belsendi túrde damyp keledi. Mınıstrlik málimetinshe, portal arqyly 2025 jyly jalpy 18 639 ótinish óńdeldi, al paıdalanýshylardyń jalpy sany – 18 303.

– Migration portalynda kórsetilgen sanattar boıynsha tirkelgen paıdalanýshylardyń ishinde Qazaqstan Respýblıkasynyń rezıdent emesteri – 12 032, Qazaqstan Respýblıkasynyń rezıdentteri – 5 378, zańdy tulǵalar – 881, jergilikti atqarýshy mekeme – 12 paıdalanýshy, – deıdi QR Eńbek jáne halyqty áleýmettik qorǵaý mınıstrligi Kazinform tilshisiniń resmı saýalyna bergen jaýabynda.

Portaldyń eń tanymal qyzmetteri qatarynda etnıkalyq qazaq mártebesin alý, ishki qonys aýdarý, jumyspen qamtý jáne áleýmettik qoldaý máseleleri bar.

– Eń kóp suranysqa ıe qyzmetter qataryna mynalar jatady: «qandas» mártebesin berý – 6 928 ótinish, onyń ishinde 3 859-y maquldanǵan; eńbek shartyna qol qoıý nıeti týraly kelisim – 5 508 ótinish; qonys aýdarýdyń óńirlik kvotasy – 1 856 ótinish; kóshý boıynsha sýbsıdııa tóleý týraly ótinish – 1 330 ótinish, – dep naqtylady vedomstva ókilderi.

Portal zamanaýı tsıfrlyq sheshimder arqyly memlekettik organdar men azamattar arasyndaǵy ózara is-qımyldy ońtaılandyrady, sondaı-aq sheteldik jumys kúshin tartýǵa arnalǵan bıznes-úderisterdi iske asyrady.

Eske sala keteıik, Eńbek jáne halyqty áleýmettik qorǵaý mınıstrligi Qazaqstan Respýblıkasynyń 2030 jylǵa deıingi kóshi-qon saıasatynyń jańa tujyrymdamasynyń jobasyn ázirledi.