Qanatbek Safınov: Qabyldanatyn zańdarǵa túzetý men ózgeris engizý – zańnamamyzdyń turaqsyzdyǵynan
NUR-SULTAN. QazAqparat – Qabyldanatyn zańdardyń shamamen jartysyna túzetýler men ózgerister engizý – bul zańnamamyzdyń turaqsyzdyǵynyń kórsetkishi. Bul týraly Senattyń jalpy otyrysynda depýtat Qanatbek Safınov aıtty, dep habarlaıdy QazAqparat tilshisi.
«Parlament aldyndaǵy asa mańyzdy eki mindet – sapaly zań qabyldaý jáne qoǵamnyń ózekti máselelerin sheshý. Muny Prezıdent aıqyndady. Qandaı zańdy sapaly dep ataýǵa bolady? Bul - bir jaǵynan áleýmettik qajettilikterge tıimdi jaýap beretin, al ekinshi jaǵynan durys daıyndalǵan jáne resimdelgen zań. Zań jobasyn ázirleýshiler áleýmettik baǵyt jáne olardyń tıimdiligi máselelerin elemeı, zańdy resimdeý men daıyndaýdyń formaldy-quqyqtyq jaǵyna basty nazar aýdardy», - dedi ol «Qazaqstan Respýblıkasynyń keıbir zańnamalyq aktilerine normashyǵarmashylyqty jetildirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qaraý barysynda.
Onyń aıtýynsha, quqyq qoldaný praktıkasyn taldaý turaqsyz zańdardyń kóp sany, kóptegen ózgerister men tolyqtyrýlar, daıyndalatyn zań jobalarynyń kópshiliginiń qabyldanatyn normalarynyń naqty boljamdarynyń bolmaýy sııaqty problemalardy kórsetedi.
Munyń bári qarama-qaıshylyqtarǵa, quqyqtyq qatelikterge, sot daýlaryna ákeledi.
«Senat ótken jyly 110 zań jobasyn qarap, qabyldady. Biraq besinshi jáne altynshy sessııalar ishinde 18 zań jobasy qaıtaryldy. Jalpy Qazaqstan Respýblıkasynda 2,5 myńnan astam zań qabyldandy. Olardyń 301-i derbes, 90 paıyzy ózgerister men tolyqtyrýlar engizý týraly zańdar jáne ratıfıkatsııalanǵan halyqaralyq sharttar. Tek qoldanystaǵy normatıvtik quqyqtyq aktilerdiń sany 51 myńnan astam. Zańdar men zańǵa táýeldi aktilerdiń kóptigi – barlyq qoǵamdyq qatynastardy normatıvtik retteýdiń kórsetkishi jáne kóbinese memlekettik organdar úshin jańa fýnktsııalar qurýǵa jáne olardyń apparatyn úlkeıýine ákeledi. Bul memlekettik qyzmetkerler úshin de, kásipkerler úshin de keń shekteýler men tyıymdarǵa ákep soǵady», - dedi senator.
Qanatbek Safınovtyń atap ótýinshe, qabyldanatyn zańdardyń shamamen jartysyna túzetýler men ózgerister engizý – bul zańnamamyzdyń turaqsyzdyǵynyń kórsetkishi.
«Ózgeris engizilmegen zań qalmady. Men zań jobasynda osy zańdardyń kóptigin jáne olardyń turaqty ózgeristerin toqtatýǵa baǵyttalǵan tıimdi tosqaýyl tappadym! Alaıda zańnamalyq tehnıkada mundaı quraldar men ádister belgili»,- dedi ol.
