Qanat Súleımenov Shymkenttiń jemqorlyqpen kúres departamentiniń basshysy qyzmetinen ketti
ShYMKENT. KAZINFORM - Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy Qanat Súleımenov basqa jumysqa aýysatynyn málimdedi.
Bul týraly general-maıor Qanat Súleımenov Facebook-tegi paraqshasynda habarlady.
— Búgin osy jazbany jarııalap, óńirdegi sybaılas jemqorlyqqa qarsy is-qımyl jónindegi birlesken jumys úshin shyn júrekten alǵysymdy aıtqym keledi. Prezıdenttiń Jarlyǵymen Sybaılas jemqorlyqqa qarsy qyzmet UQK quramyna engenin bilesizder, osyǵan baılanysty basqa jumysqa aýysamyn. Shymkent qalasyna – gúldenýdi, al qala turǵyndaryna amandyq pen órkendeýdi tileımin, — dep atap ótti Qanat Súleımenov.
Qanat Súleımenov Shymkenttegi jemqorlyqpen kúres departamentin 2024 jyldyń qyrkúıeginen beri basqaryp keldi.
Aıta keteıik, budan buryn UQK Shymkenttiń turǵyn úı basqarmasynyń basshysyn ustaǵanyn rastaǵanyn jazǵan bolatynbyz.