Qanat Sharlapaev jer qoınaýyn paıdalanýshylar úshin roıaltı normalaryn engizýdi usyndy
ASTANA. KAZINFORM – Bıýdjetten qarjylandyrylatyn irgeli ǵylymdar tizbesine geologııa engizilýi múmkin. Mundaı usynysty búgin Úkimet otyrysynda Ónerkásip jáne qurylys mınıstri Qanat Sharlapaev jasady.
- Taý-ken salasyna keletin ınvestorlar sanyn arttyrý úshin Salyq kodeksiniń jańa jobasy aıasynda roıaltı engizý máselesi pysyqtalyp jatyr. Roıaltı jaıly Dúnıejúzilik bank óz usynysynda atap ótken bolatyn. Mıneraldy shıkizatty satý qunyna negizdelgen roıaltıdi engizý, halyqaralyq taý-ken kompanııalary úshin salyq salýdyń ashyqtyǵyn jáne túsinikti mehanızmin qamtamasyz etedi, - dedi mınıstr.
Osyǵan baılanysty, Qanat Sharlapaev Premer-Mınıstr Oljas Bektenovten Ulttyq ekonomıka, jáne Qarjy mınıstrlikterine jańa Salyq kodeksiniń jobasyna 2026 jylǵy 1 qańtardan bastap óndirýge lıtsenzııa alǵan jer qoınaýyn paıdalanýshylar úshin roıaltı normalaryn engizý týraly tapsyrma berýin surady.
- Sonymen qatar elimiz úshin geologııa salasynyń strategııalyq mańyzyn eskere otyryp, Ǵylym, jáne Qarjy mınıstrlikterine Ǵylym týraly zańǵa tolyqtyrýlar engizý arqyly qarjylandyrylatyn irgeli ǵylymdar tizbesine geologııany engizýdi tapsyrýyńyzdy suraımyz, - dedi ol.