Qanat Sharlapaev ýtılalymǵa qarsy petıtsııaǵa qatysty pikir bildirdi

ASTANA. KAZINFORM — Ónerkásip jáne qurylys mınıstri Qanat Sharlapaev ýtılalymǵa qarsy onlaın petıtsııaǵa qatysty pikir bildirdi.

Qazir onlaın petıtsııa saıtynda ýtılalymdy joıý boıynsha 49,5 myńnan astam adam qol qoıǵan. Oǵan 50 myń adam daýys bergen jaǵdaıda, Úkimet atalǵan máseleni qarastyrýy tıis.

«Tıisti deńgeıde daýys jınaǵan petıtsııany Úkimet mindetti túrde qarastyryp, óziniń sheshimin shyǵarýy kerek. Sondyqtan oǵan jetkilikti deńgeıde qol qoıylsa, zańda belgilengen tártipte Úkimet adamdardyń talaptaryn talqylaıdy. Osynyń aıasynda jumys toptary qurylyp, ony qarastyrýǵa Parlament depýtattaryn shaqyramyz», - dedi Q. Sharlapaev Senatta tilshiler suraǵyna jaýap bere otyryp.

Bul turǵyda ol ujymdyq talqylaý aıasynda petıtsııaǵa qatysty Úkimet óziniń sheshimin jarııalaıtynyn aıtty.

«17 mamyrda ýtılalymǵa qarsylyq bildirip júrgen adamdarmen kezdestim. Olarmen osy taqyrypta pikir almastyq. Qazir 49 myńnan astam osy petıtsııaǵa qol qoıǵan eken. Jalpy, elimizde avtomobıl, aýyl sharýashylyǵy tehnıkasyn shyǵaratyn ónerkásipte de osynshama adam jumys istep jatyr. Bul turǵydaǵy sheshimderdi jan-jaqty pysyqtaǵan jón. Eki taraptyń kózqarastary qarama-qaıshy bolsa, máseleni sheshý úshin zańnamalyq tetikter bar. Bul turǵyda petıtsııa nátıjesinde Úkimet osy máseleni qarastyrady dep oılaımyn. Biraq dál qazir taǵy da qaıtalap aıtamyn, biz qazir ýtılalymdy qaıta qarastyrýdy josparlap otyrǵan joqpyz», - dedi mınıstr.

Bir aı buryn Ónerkásip mınıstri Qazaqstanda ýtılalym qunyn azaıtý josparda joq ekenin málimdegen edi.