Qanat Sharlapaev ýtıl alymyna qarsy petıtsııa týraly: Meni qorqytyp jatqan adamdar bar
ASTANA. KAZINFORM — Ónerkásip jáne qurylys mınıstri Qanat Sharlapaev ýtıl alymyna qarsy petıtsııa jóninde pikir bildirdi.
«Ýtılalymǵa qatysty máseleni sheshý úshin zań aıasynda jumys isteýimiz kerek. Men TikTok jelisinde birneshe vıdeo men pikirdi kórdim, meni qorqytyp jatqan adamdar bar. Meniń aıtarym — ár máseleni, qoǵamnyń problemalaryn zań aıasynda sheshýimiz kerek. Al petıtsııa 50 myń qol jınasa, ony qaraımyz», — dedi Qanat Sharlapaev Úkimet otyrysynan keıin ótken baspasóz máslıhatynda.
Sondaı-aq, BAQ ókilderi mınıstrge «Memleket basshysy ýtıl alymyn alyp tastaý jóninde sheshim qabyldasa, siz qarsy bolasyz ba?» degen saýal qoıdy.
«Árıne, men Prezıdentke qarsy shyqpaımyn. Halyqtyń narazylyǵyn jaqsy túsinemiz, alaıda qoǵamnyń ózge ókilderiniń pikirin tyńdamaımyz ba? Qazir ónerkásipti qorǵaý men saqtaýdy 10 myńnan astam adam qoldap otyr. Olardyń pikirin ne isteımiz? Meniń oıymsha, petıtsııa mehanızmi naqty demokratııanyń kórsetkishin kórsetip otyr ǵoı», — deıdi ol.
