Qanat Sharlapaev jýrnalısterge otandyq kólik minýge ýáde berdi
ASTANA. KAZINFORM –Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda qyzmettik kóligin otandyq avtomobılge aýystyrýǵa ýáde berdi.
Foto: Soltan Jeksenbekov / Kazinform
«Bul suraqqa birneshe ret jaýap berdik. Taǵy da jaýap bereıin sizge. Meniń qyzmettik kóligimdi Prezıdenti is basqarmasy usynǵan. Bul Kia kóligi. Ózim tańdamaǵandyqtan, qaıda qurastyrylǵanyn aıta almaımyn. Bul kólikterdi bizge tańdatpaıdy», dedi mınıstr.
BAQ ókilderi ónerkásip salasyn basqaratyn mınıstrge nege otandyq kólikpen júrip, ózgelerge úlgi kórsetýge bolmaıtynyn surady.
«Bir jaǵynan sizdiki durys shyǵar. Qazaqstanda qurastyrylǵan avtomobılge otyrý kerek shyǵar. Men elimizde qurastyrylǵan kólik berýin surap kóreıin. Buǵan deıingi jumysymda Elantra kóligimen júrgenmin. Qyzmet ornym aýysty da, bergen kólikpen júre berdim. Kólik máselesin kótermegen bolatynmyn. Endi qaıtadan elde qurastyrylǵan kólikke otyramyn. Budan eshqandaı problema kórip otyrǵan joqpyn. Bul jerde maǵan qandaı kólik beretinine baılanysty. Ne berse, sonymen júremin», - dedi Qanat Sharlapaev.