Qanat Omar Eýropadaǵy halyqaralyq festıvalda «kúmis» enshiledi
NUR-SULTAN. QazAqparat – Aqyn Qanat Omar jaqynda Belgııa men Frantsııada ótken «Emıgranttyq lıra» atty halyqaralyq poetıkalyq festıvalda kúmis júlde enshiledi, dep habarlaıdy QazAqparat. Bul týraly QR Prezıdentiniń baspasóz hatshysy Berik Ýálı facebook-tegi paraqshasynda jazdy.
Ol Avstralııa, Avstrııa, Vengrııa, Germanııa, Izraıl, Qazaqstan, Qytaı, Latvııa, Moldova, Polsha, Reseı, AQSh, Ýkraına, Fınlıandııa jəne Chehııa sııaqty 15 elden avtorlar qatysqan konkýrstyń qorytyndysy boıynsha ekinshi oryndy ıelendi.
«Bul bərimiz úshin zor qýanysh! Men Qanatty maqtan tutamyn jəne oǵan tabys, eń bastysy, óz júreginiń qalaýymen júre berý úshin kúsh-qýat pen shyǵarmashylyq shabyt tileımin! Uly dalada aqyndar ərqashan ulyqtalǵan. Halyq olardy qurmettegen. Bıleýshiler olardyń sózine qulaq asqan, taǵdyrdyń jazýymen ulttyq qundylyqtardy saqtaýǵa qabiletti jandardy qasterleı bilgen. Bul ómirde laıyqty tulǵalardyń bəri birdeı baǵalana bermeıdi. Bir ǵana zor jetistikpen tipti de ólshenbeıdi…
Bul - biz saqtaýǵa tyrysatyn uly dástúr. Biz - Prezıdenttiń Baspasóz qyzmeti, Mádenıet jáne sport mınıstri Aqtoty Raıymqulova jəne «Qazaq áýenderi» AQ Qazaqstannyń daryndy avtorynyń sheteldik festıvalǵa baryp, Brıýssel, Lej, Parıj sııaqty əlemniń mərtebeli sahnalarynan óz ónerin kórsetýine múmkindik týǵyza alǵanymyzǵa qýanyshtymyz. Qazaqtyń uly dalasynyń daryndy perzentteri - Əmire Qashaýbaevty, Almas Almatovty, Dımash Qudaıbergendi tyńdaǵandaı, baǵalaǵandaı, onyń da ónerin tyńdady, baǵalady. Qanat halqynyń senimin aqtady. Onyń aldaǵy ýaqytta zor jetistikterge jetetinine senemin jáne úlken úmit artamyn. Otanymyzdyń atyn asqaqtatatyn basqa da barsha aqyndarymyz ben jazýshylarymyz, sýretshilerimiz ben kınorejısserlerimiz, ərtisterimiz ben oryndaýshylarymyz osyndaı bıikterden kórine bersin!»,- dep jazdy Berik Ýálı.
