Qanat Mýsın: Ákim saılaýyna úmitkerdi halyq ta usyna alýy kerek

NUR-SULTAN. QazAqparat – Májilistiń Zańnama jáne sot-quqyqtyq reforma komıtetiniń tóraǵasy Qanat Mýsın jergilikti qaýymdastyqtarǵa ákimder saılaýyna úmitkerdi usyný múmkindigin berýdi usyndy, dep habarlaıdy QazAqparat tilshisi.

«Búgin aıtqan usynystaryńyz zań jobasyn talqylaýǵa depýtattyq túzetýler arqyly ense, qaraýǵa daıynbyz. Eshqandaı erekshe jaǵdaı bolmaıdy. Ákim saılaýyna úmitkerlerdiń biliktilik talaptaryna, saılanyp alyp, keıin partııadan shyqqan ákimderdiń taǵdyry týraly máseleler kóp aıtyldy. Ákim bolýǵa úmitkerlerdi usyný sýbektisi týraly da aıtýymyz kerek dep oılaımyn», - dedi Qanat Mýsın.

Ol zań jobasynda kandıdat usynýdyń tek úsh sýbektisin qarastyrylyp otyrǵanyn eske saldy.

«Zań jobasynda saıası partııanyń usynýy, ózin-ózi usyný jáne osy eki nusqa da múmkin bolmasa, aýdan ákimi usyný degen sýbektiler ǵana qarastyrylǵan. Biraq men ákim bolýǵa úmitkerdi jergilikti qaýymdastyqtyń da usyna alýy kerek degen máseleni qaraýdy usynar edim. Menińshe bul da mańyzdy másele. Bolashaq ákim ózin-ózin usyný bir basqa da, jergilikti halyq usynsa múlde basqa másele. Jergilikti qaýymdastyq ta óz kandıdatyn usyna alýy kerek», - dep túıindedi komıtet tóraǵasy.

Sondaı-aq, Qanat Mýsın jańa ózgertýler boıynsha aýdan ákimderi de jergilikti ákimder saılaýyna kandıdat usyna alatynyn aıtty.

Buǵan deıin habarlaǵanymyzdaı, Ulttyq ekonomıka mınıstrligi ázirlegen zań jobasynda saıası partııalardyń Májilis saılaýyna tirkeýden ótý shegin 5 paıyzǵa túsirý kózdelgen.