Qanat Islamnyń jańa menedjeri chempıondyq jekpe-jekterge shyǵýdy kózdeıdi
ASTANA. QazAqparat - WBO NABO men WBA Inter-Continental belbeýleriniń ıegeri Qanat Islam (25-0, 20 KO) jańa menedjeri - Egıs Klımas «Qazaqtyń» basty artyqshylyǵyn atady, dep habarlaıdy QazAqparat tilshisi Youtube jelisindegi BerikTV arnasyna
«Qanat Islam korpýstan qatty urady. Bul - eski qazaq boksynyń utymdy bir tusy. Ol - myqty boksshy. Onyń daıyndyǵy joǵary. Bálkim, buǵan deıin oǵan laıyqty qarsylas bolmady. Sol sebepti AQSh-tyń boks jankúıerleri jáne basqa adamdar ony baıqamady. Qanat ta ózin jan-jaqty kórsete almady. Biz basqa jolmen júremiz, birden chempıondyq jekpe-jekterge shyǵýǵa tyrysamyz. Alǵashqy jekpe-jek sondaı bolady dep aıta almaımyn. Degenmen, bir-eki aıqastan keıin tek chempıondyq tıtýtaldar úshin ǵana talasatyn bolamyz», - deıdi E.Klımas.
Onyń oıynsha, Qanat Islam - álemdik deńgeıdegi sportshy. Sol sebepti onyń qatysýymen úlken boks keshterin uıymdastyrýǵa ábden bolady. Ony Qazaqstannyń jankúıerleri ǵana emes, álemniń boks fanattary da úlken qyzyǵýshylyqpen kóredi.
Aıta keteıik, búgin Qanat Islam óziniń Instagram jelisindegi paraqshasy arqyly AQSh-tyń tanymal menedjerimen kelisimshartqa otyrǵanyn resmı túrde jarııalady. Búginde Egıs Klımaspen tórt qazaqstandyq boksshy - Madııar Áshkeev (8-0, 4 KO), Saǵadat Rahmanqulov (1-0, 1 KO), Meıirim Nursultanov (5-0, 4 KO) pen Ashat Ýálıhanov (2-1, 2 KO) jumys isteıdi. Qanat Islam jańa menedjermen birge chempıondyq jekpe-jekterge jetetinine senimdi.
