Qanat Islamnyń Robson Assıspen aıqasyn tikeleı efırde kórsetedi
ASTANA. QazAqparat - Qanat Islamnyń Robson Assıspen jekpe-jegin «Qazaqstan» men «Kazsport» telearnalary tikeleı efırde kórsetedi, dep habarlaıdy "Qazaqstan " telearnasy.
18 aqpan kúni Ýılmıngton qalasynda (AQSh, Delaver shtaty) WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 18 KO) men brazılııalyq Robson Assıs (16-3-0, 9 KO) jekpe-jekke shyǵady.
Boksshylardyń kezdesýi kishi Roı-Djonstyń boks keshiniń aıasynda ótedi dep kútilýde. Bul álemge «Qazaq» degen atpen tanylǵan Qanat Islamnyń kásipqoı rıngtegi 23-shi kezdesýi bolmaq.
Qanat osyǵan deıin 22 kezdesýinde jeńiske jetip, onyń 18-in nokaýtpen aıaqtaǵan. Al, Robson kásipqoı rıngte 19 kezdesýiniń 16-yn jeńip, 9 jekpe-jeginde qarsylasyn merziminen buryn utyp, úsheýinde jeńiliske ushyraǵan.
Qanat Islam 1984 jyldyń 13 qyrkúıeginde Qytaıda dúnıege kelip, Qazaqstanǵa 2010 jyldary kóship kelgen.
Buǵan deıin áýesqoı boksta Qytaıdan Beıjiń Olımpıadasyna qatysyp, qola medalǵa ıe bolǵan. Kásipqoı bokspen 2012 jyldan beri aınalysyp keledi.
Qanat pen Robsonnyń jekpe-jegi 18 aqpan kúni saǵat 07:55-te kórsetiledi.
