Qanat Islamnyń ornyna qazaqstandyq qaı boksshynyń aıqasy ótetini anyqtaldy
ASTANA. QazAqparat -Orta salmaqtaǵy qazaqstandyq boksshy Meıirim Nursultanovtyń (6-0, 5 KO) kezekti aıqasy ótetin ýaqyt belgili boldy, dep habarlaıdy Sports.kz.
Otandasymyz 23 maýsym kúni Los-Andjelestegi (Kalıfornııa shtaty) Belasco Theater arenasynda meksıkalyq Hosýe Obandomen (16-20-1, 12 KO) judyryqtasady. Jekpe-jek 6 raýndqa eseptelgen.
Aıta keteıik, osy keshtiń aıasynda Qanat Islamnyń meksıkalyq Fernando Karkamomen jekpe-jegi ótýi tıis edi. Alaıda jerlesimizdiń aıaǵyn jaraqattap alýyna baılanysty kezdesýden bas tartýǵa týra keldi.
Shoý uıymdastyrýshysy - Golden Boy promoýterlik kompanııasy. Keshten ESPN2 telearnasy tikeleı efır arqyly habar taratatyn bolady.
Nursultanov pen Islamnyń kásipqoı bokstaǵy isterimen tanymal menedjer Egıs Klımas aınalysady.
