Qanat Islamnyń kezekti jekpe-jegine qatysty tyń aqparattar málim boldy
ASTANA. QazAqparat - Qazaqstandyq boksshy Qanat Islam (25-0, 20 KO) 23 maýsymda rıngke qaıta oralady, dep habarlaıdy Sports.kz.
BoxRec.com tanymal saıtynyń málimetteri boıynsha, Qanat Los-Andjelestegi Belasco Theatre (AQSh, Kalıfornııa shtaty) oıyn-saýyq kesheninde judyryqtasady. Ázirge onyń qarsylasy belgisiz. Alaıda kezdesýdiń 10 raýndqa eseptelgeni aıtylady. Sharany Golden Boy Promotions kompanııasy uıymdastyrǵan. AQSh-ta bul keshti ESPN2 telearnasy translıatsııalaıdy. Bul shoýdyń hedlaınerleriniń kim bolatyny da ázirge belgisiz. Keshtiń basty kezdesýi Vırdjıl Ortıs (9-0, 9 KO) - Hýan Karlos Salgado (27-8-1, 16 KO) jekpe-jegi bolmaq.
Aıta keteıik, Islam óziniń sońǵy kezdesýin 2017 jyldyń qyrkúıeginde Astanada ótkizgen bolatyn. Toǵyzynshy raýndta ol kanadalyq boksshy Brendon Kýkty (20-1, 13 KO) tehnıkalyq nokaýtpen jeńdi. .
