Qanat Islamnyń kezekti qarsylasy belgili boldy
ASTANA. QazAqparat - Qazaqstandyq boksshy Qanat Islamnyń (25-0, 20 KO) 23 maýsymda ótetin aıqasyndaǵy qarsylasy belgili boldy, dep habarlaıdy Sports.kz.
Qazaqstandyq boksshy 27 jastaǵy meksıkalyq Fernando Karkamomen (23-8, 18 KO) aıqasady. Jekpe-jek Los-Andjelestegi (AQSh, Kalıfornııa shtaty) Belasco Theatre oıyn-saýyq kesheninde ótedi jáne ol on raýndqa sozylmaq.
Karkamo kásibı mansabynda eki tıtýldyq aıqas ótkizgen: 2012 jyly ol amerıkalyq kishi Fıdel Maldonadony (24-4-1, 19 KO) nokaýtqa jiberip, WBC Silver jastar belbeýin jeńip aldy. Keıin eki jyl ótken soń reseılik Petr Petrovty (38-6-2, 19 KO) nokaýtqa jiberip, WBA-NABA bos tıtýly men jeńil salmaqtaǵy WBO NABO «ýaqytsha» belbeýin ıelendi.
Fernando sońǵy jekpe-jegin 2017 jyldyń 13 qazanynda ótkizdi - ol úshinshi raýndta otandasy Emılıo Kanısalesty (6-6-1, 5 KO) nokaýtqa jibergen edi.
