Qanat Islamnyń kelesi jekpe-jegi qashan ótedi

ALMATY. QazAqparat – Jeńilip kórmegen qazaqstandyq boksshy Qanat Islam (27-0, 21 KO) óziniń jattyǵýǵa kiriskenin jáne kelesi jekpe-jektiń ótetin ýaqytyn aıtty, dep habarlaıdy QazAqparat.

«Dostar! Jattyǵý protsesi bastaldy! Kelesi jyldyń naýryz aıynda bizdi úlken jekpe-jek kútip tur! Jańalyqtardy qadaǵalańyz», — dep jazdy Qanat Islam Instagram paraqshasynda jaǵada jattyǵyp júrgen vıdeosyn jarııalap.

Eske sala keteıik, boksshy osy jyldaǵy sońǵy jekpe-jegin 26 qazanda ótkizgen bolatyn. Almatyda basty boks keshinde qazaqstandyq sportshy biraýyzdan sýdıalardyń sheshimimen Namıbııadan kelgen boksshy Ýolter Kaýtondokvany (18-2, 17 KO) — 97-92, 97-92, 99-92 esebimen utty. Osylaısha ol birinshi orta salmaqta International WBO tıtýlyn saqtap qaldy.

Nátıje kóptegen daýdyń týýyna sebep boldy, al Kaýtondokva tarapy Dúnıejúzilik boks uıymynan (WBO) ótemaqy talap etýge sheshim qabyldady.