Qanat Islamnyń kelesi jekpe-jegi qashan bolady?
ASTANA. QazAqparat - Qanat Islamnyń demeýshisi Baýyrjan Ospanov boksshynyń kelesi jekpe-jegi qashan ótetinin málim etti, dep habarlaıdy boxingnews.kz.
«Qanat Islam Amerıkada jattyǵý jasap jatyr. Onyń kelesi jekpe-jegi 23 naýryzǵa belgilengen. Qarsylasy ázirge belgisiz. Qanat WBC boks qaýymdastyǵynyń reıtınginde úzdik boksshylardyń qatarynda, taǵy bir kezdesý ótkizse, úzdik bestikke enedi. Qanat ta, onyń komandasy da qarjydan esh qınalyp otyrǵan joq», - deıdi B.Ospanov.
Jekpe-jek Domınıkan Respýblıkasy, Kolýmbııa nemese AQSh-ta ótýi múmkin. Aıta ketý kerek, Qanat Islam búginge deıin barlyq kezdesýlerin shetelderde - Ekvador, Kolýmbııa jáne Domınıkan Respýblıkasynda ótkizdi. Qazaqstandyq boksshynyń promoýteri Nelson Lopez buǵan deıin birneshe ret Qanattyń Qazaqstanda jekpe-jek ótkizýi yqtımal ekenin aıtqan bolatyn.
Qanat Islam kásibı boksta 18 jekpe-jek ótkizip, barlyǵynda jeńiske jetti (15 nokaýt), ol WBA Fedelatin belbeýin ıemdengen. Sonymen qatar, otandasymyz Máskeýde argentınalyq Gýıdo Nıkolas Pıttomen orta salmaqtaǵy WBC International Silver ataǵyn sarapqa salýy tıis bolatyn. Alaıda, bul kezdesý belgisiz sebeptermen keıinge shegerildi.
