Qanat Islamnyń kelesi qarsylasy jaıly ne bilemiz

Robson Soaresh de Assıs 1978 jyly dúnıege kelgen. Kásipqoı bokstaǵy mansabyn 2006 jyly bastaǵan. Alǵashqy jekpe-jeginde Eýrelıýs Hose de Maýra esimdi boksshyny upaı aıyrmasymen jeńgen. Odan keıin 6 jyldaı ýaqyt kásipqoı sharshy alańda jekpe-jek ótkizbegen. 2012 jyly boksqa qaıta oralyp, jeńis jolyn jalǵaǵan. 

Brazılııalyq boksshy 2 jyl ishinde 13 jekpe-jek ótkizip, barlyǵynda jeńiske jetedi. Argentınalyq Hektor Karlos Santanaǵa qarsy jekpe-jekte jeńiske jetip, mansabyndaǵy alǵashqy chempıondyq belbeýin jeńip alady. Ol - jartylaı orta salmaqtaǵy interim WBO Latino belbeýi edi.

Robson Soaresh de Assıs barlyq jekpe-jegin óz elinde ótkizip keldi. 2014 jyly boksshy WBO Oriental jáne "PABA" chempıondyq ataqtary úshin Aýstralııaǵa jol tartty. Onda ol endi ǵana tanylyp kele jatqan Djeff Hornmen judyryqtasýǵa kelisken edi. Alaıda brazılııalyqtyń ózge eldegi alǵashqy jekpe-jegi sátsiz aıaqtaldy. Tórtinshi raýndta eki ret tizerlep turdy. Al besinshi raýndta nokaýt alyp, jekpe-jekti jalǵastyra almady. Djeff Horn bolsa jyldan-jylǵa tanylyp, jeńilissiz keledi. Sáýir aıynda Djeff Horn áıgili Mennı Pakıaomen judyryqtasady.

Brazılııalyq boksshy Aýstralııadaǵy jeńilisinen keıin kásipqoı boksty tastap ketken joq. Araǵa bir aı sala otandasy Flavıo Pardınomen judyryqtasty. Qarsylasyn jeńip shyqqan.

2015 jyly Robson Soaresh de Assıske kezekti ret chempıondyq ataqqa talasýǵa múmkindik týdy. Brazılııalyq osy jekpe-jekte jeńiske jetýge talpyndy. Alaıda Kanadanyń Toronto qalasynda ótken jekpe-jekte ýaqytsha WBA-NABA chempıondyq ataǵyn ıelene almady. Kolýmbııalyq boksshy Samýel Vargastan 6 raýndta tehnıkalyq nokaýtpen utyldy.

Robson Assıs óz salmaǵy boıynsha brazılııanyń úzdik bokshysy. Olaı deıtinimiz óz salmaǵyndaǵy brazılııalyq boksshylardyń kópshiligin aıqyn jeńgen. Samýel Vargastan utylǵannan keıin otandasy Hoel Perreıra de Sılvamen kezdesti. Qarsylasyn birinshi raýndta-aq nokaýtpen jeńdi.

Brazılııalyq boksshy sońǵy jekpe-jegin kanadalyq Stıven Batlerge qarsy ótkizip, 21 jastaǵy qarsylasynan utylyp qaldy. Kvebekte (Kanada) ótken boks keshinde Robson Assıs IBF tujyrymy boıynsha jastar arasyndaǵy álem chempıonyna qarsylyq tanyta almady.

Óz elinde ótkizgen barlyq jekpe-jekterinde jeńiske jetse, ózge elde Robson Assıstiń joly bolmaǵan. Qarsylastary da qaýqarly edi. Búginde ony jeńgen boksshylar kásipqoı boksta tanylyp úlgerdi. Bir sózben aıtqanda, Qanattyń qarsylasy osal emes, tis qaqqan boksshylardyń biri.

Qazaqstandyq jankúıerler Qanat Islamnyń kelesi qarsylasyn asyǵa kútti. Tipti keı basylymdar otandasymyzdy áıgili meksıkalyq Saýl "Kanelo" Alvarespen kezdesip qalýy múmkin ekenin de jazdy. Degenmen Qanatqa qarsylas Brazılııadan tabyldy. Qos boksshy arasyndaǵy jekpe-jek Roı Djons (kishisi) pen Bobbı Gan arasyndaǵy kezdesýdiń anderkartynda ótedi. Bul da boksshylardyń ynta-jigerin arttyrary sózsiz.

38 jastaǵy brazılııalyq boksshy da sporttyq mansabynyń sońynda kóp jeńilgendi maqsat tutpaıdy. Chempıon atanar múmkindikterin múlt jiberip alǵany sózsiz. Al Qanat Islam úshin ár jekpe-jektiń mańyzy joǵary. Otandasymyz úshin iri chempıondyq ataqtarǵa talas ótkizetin jekpe-jekteri alda dep bilemiz.

 

Qanat Islam brazılııalyq Robson Assıske qarsy jekpe-jeginde chempıondyq ataǵyn qorǵamaıdy. Bul týraly Nelsons Promotion promoýterlik kompanııasynyń Qazaqstandaǵy ókili Nurǵazy Іsmaǵambetov aıtqan edi.

"Qanat Islam kásipqoı bokstaǵy kelesi kezdesýin 17-aqpan kúni Nıý-Djersı shtatyndaǵy Nıýarka qalasynda ótedi. Roı Djonstyń qatysýymen ótetin boks keshinde Islam 10 raýndtyq jekpe-jek ótkizedi. Biraq, bul keshte Qanat chempıondyq ataǵyn qorǵamaıdy. Otandasymyz chempıondyq ataǵyn tek Qazaqstanda qorǵaımyn dep otyr. Qarsylasynyń kim bolatynyn aldaǵy ýaqytta habarlaımyz. Qanat Islam qazir AQSh-ta. Nelson Lopezdiń qol astynda jattyǵý jumystaryna kirisip ketti", - degen edi.

 

Qanat Islam kásipqoı bokstaǵy óziniń sońǵy jekpe-jegin 2016 jyldyń 29 qazan kúni Almatyda ótkizip, tóreshilerdiń sheshimi boıynsha ganalyq boksshy Patrık Alloteıden basym túsken edi.