Qanat Islamnyń kelesi qarsylasy ony «orys» dep oılap júr
ASTANA. QazAqparat - Kanadalyq boksshy Brendon Kýk (18-0, 11 KO) aldaǵy jekpe-jekke qatysty óz oıyn bildirdi, dep xabarlaıdy QazAqparat tilshisi.
Aıta ketken jón, Qanat Islam men Brendon Kýk arasyndaǵy jekpe-jek 9 qyrkúıekte ótedi. Kanadalyq boksshy Astanaǵa on kún buryn kelemin dep otyr. Osy ýaqyt aralyǵynda ol jergilikti klımatqa beıimdelýdi kózdeıdi.
"Islam - jaqsy boksshy. 2008 jylǵy Beıjiń Olımpıadasynda qola júldeni de ıelengenin jaqsy bilemiz. Alaıda ol men sııaqty "Jaman jigitpen" (Bad boy - Kýktyń laqap aty) áli kezdespegen. Meniń soqqym dittegen jerine jetkende ol osyny túsine bastaıdy. Sol kezde soǵys bastalady! Sondaı-aq, men Islamnyń Gennadıı Golovkınmen birge túsken fotosyn da kórdim. Onyń Saýl Alvarespen kezdesýdi josparlaǵanyn da bilemin. Alaıda osy joly "Kanelo" GGG judyryqtasatyn boldy. Men bilemin, orystar boks áleminde úzdikterdiń qataryna kiredi. Alaıda ol - adam, men de adammyn. Qanat meniń qalaı daıyndalyp jatqanymdy bilmeıdi. Sol sebepti ol jaqqa barǵanda jeńisti qoldan bere salmaımyn. Ony jeńsem, úzdik ondyqqa kiremin", - deıdi Kýk.
Budan bólek, kanadalyq boksshy Islamnyń burynǵy qarsylastary osal boldy dep sanaıdy. Osy oraıda ol da Qanattyń kásibı bokstaǵy alǵashqy qarsylasy - Denıel Bıtony (1-25) eske aldy. "Mende ondaı qarsylastar bolǵan joq. Islam men sııaqty opponenttermen áli kezdespedi", - dep atap kórsetti Kýk.
Aıta keteıik , kúni keshe Qanat Islam Astanaǵa ushyp keldi. Aldaǵy jekpe-jekke deıin ol elordada jattyǵady.
