Qanat Islamnyń qarsylasy kim ekeni belgili boldy
ASTANA. QazAqparat - 29 qazanda Almaty qalasynda úlken boks keshi ótedi. Onda qandasymyz Qanat Islam 22-shi jekpe-jegin ótkizip, WBA (Interim) tujyrymy boıynsha álem chempıony ataǵyna talasady.
Qanat Islam orta jeńil salmaq boıynsha Karıb aımaǵynyń úzdigi, WBA FedeCaribe tujyrymynyń chempıony. Ol osy ýaqytqa deıin 21 kezdesý ótkizip, bárinde jeńiske jetken. Onyń 18-in nokaýtpen utqan. Sportshynyń laqap aty - «Qazaq».
Búgin Qanat Islamnyń ózimen habarlasyp, qarsylasynyń kim ekenin surap bildik.
«Qarsylasym týraly syrttaı jaqsy bilemin. Ol ganalyq boksshy. Esimi - Patrık Alloteı. Ol kásipqoı boksta osy ýaqytqa deıin 36 kezdesý ótkizipti. Onyń ekeýinde ǵana utylyp, qalǵan jekpe-jekteriniń barlyǵynda jeńiske jetken. Al 24 kezdesýinde qarsylasyn nokaýtpen utqan boksshy», - dep atap ótti Qanat Islam.
Ol sondaı-aq, Almatyda jekpe-jekke asa joǵary deńgeıde jattyǵyp jatqanyn, óz elinde jergilikti jankúıerlerdi uıaltpaıtyndaı óner kórsetetinin aıtyp ótti.
«Qarsylasym osal emes. Ol da «jeńsem» degen nıetpen kele jatyr. Biraq, men kásibı rıngte alǵash ret óz elimizde jergilikti jankúıerler aldynda sharshy alańǵa shyqqaly otyrmyn. Men olardy uıatqa qaldyrmaımyn dep oılaımyn. Almatyda kúndiz-túni jattyǵyp jatyrmyn. Qazir jumys josparym bári oıdaǵydaı», - dedi boksshy.
Sonymen birge, Qanat Islam 29 qazanda jankúıerlerin jekpe-jek ótetin «Almaty arena» sport keshenine shaqyrdy.
«Bul jekpe-jek men úshin ǵana emes, qazaq eli úshin asa mańyzdy dep oılaımyn. Sebebi, WBA (Interim) tujyrymy boıynsha álem chempıony ataǵyna talasqaly otyrmyn. Sondyqtan, 29 qazan kúni barlyq jankúıerlerimidi jarys ótetin Almaty qalasynda «Almaty arena» sport keshenine kelip, meniń ónerimdi tamashalaýǵa shaqyramyn», - dedi boksshy Qanat Islam.
