Qanat Islamnyń qarsylasy qanshalyqty myqty?
ASTANA. QazAqparat - Qanat Islamnyń AQSh-ta 8 mamyr kúni ótetin (Astana ýaqytymen 9 mamyr) 21-shi jekpe-jegin «Qazaqstan» ulttyq arnasy tikeleı efırde kórsetedi degeli elimizdegi ǵana emes, alys-jaqyn sheteldegi qandastarymyz da kógildir ekranǵa kóz tigetin kúndi asyǵa kútip otyr.
Bul Qanat baýyrymyzdyń osy jyldaǵy alǵashqy aıqasy. Ol ótken jyly 7 qarashada Maıamıde domınıkandyq Djonatan Batıstany birinshi raýndta nokaýtpen jeńip, kásipqoı rıngtegi 20-jeńisine qol jetkizgen bolatyn. Mine, sodan beri Alash ulandary Qanat baýyrynyń aıqasyn saǵynyp júrgeni aıtpasaq ta túsinikti. Osy eki aralyqta otandasymyz bir emes, birneshe kezdesý ótkizýdi josparlaǵan bolatyn. Alaıda, belgisiz sebepterge baılanysty ótpeı qalǵanyn da boks súıer qaýym jaqsy biledi. Qazir Qanat Islam 9 mamyr kúni ótetin jekpe-jegine tas-túıin daıyn. Bul kúni elimizde jeńis kúnin atap ótetin aıtýly mereke ekeni belgili. Osy jeńis kúnine tuspa-tus kelip otyrǵan boks keshinde otandasymyzdyń da kezekti jeńisine qol jetkizýine Alla násip etkeı dep tileımiz.
Jarys bolǵan jerde bireý utyp, bireý utylatyny zańdylyq. Sol úshin búgin Qanat baýyrymyzdyń qarsylasy kim? Ol qanshalyqty myqty? Osy jaıynda oqyrmandarymyzǵa qysqasha aqparat berýdi jón sanap otyrmyz. Jerlesimizdiń qarsylasy orta salmaqta (69 keli) óner kórsetip júrgen kolýmbııalyq boksshy - Hýan de Anxel. Ol osy ýaqytqa deıin 22 kezdesý ótkizgen. Sonyń 17-in nokaýtpen utyp, bireýinde qarsylasymen teń dárejede óner kórsetipti. Al 3 kezdesýinde qarsylasyna ese jibergen. Bıyl jasy 28-de. Laqap aty - La Amenaza (La Amenaza). Hýan de Anxel osyǵan deıingi barlyq jeńiske jetken jekpe-jekterin óz otanynda ótkizgen. Al bir ret Meksıka elinde judyryqtasyp, onda joly bolmaı qazirgi kásipqoı boks jolyndaǵy alǵashqy jeńilisine ushyrady. Mine, 9 mamyr kúni ol ekinshi ret ózge elde qazaqtyń qaradomalaq uly Qanat Islammen judyryqtaspaq. Al Qanat Islam osyǵan deıingi kezdesýleriniń barlyǵyn qurlyqtyń arǵy betinde ótkizip keledi. Qandasymyz ár aıqasyn ózge elde ótkizse de, áli birde-bir ret jeńilistiń aşy dámin tatqan emes. Anxel tuńǵysh ret syrt alańda súringenin aıtyp óttik. Bul joly ol Qanatqa qanshalyqty qarsylyq tanytatynyn aldaǵy sanaýly kúnderden keıin kóretin bolamyz. Anxel úshin de 9 mamyr kúni ótetin aıqas bıylǵy maýsymdaǵy alǵashqy jekpe-jegi bolmaq. Demek, eki boksshy da uzaq demalystan keıin rıngke shyqqaly otyr. Sondyqtan da, ekeýi de rıngti saǵynyp qalǵany anyq. Boks biz oılaǵannan da tartysty ótýi bek múmkin. Qos batyrdyń jekpe-jek keshin AQSh-tyń «Bounce» arnasy kórsetetin bolsa, elimizde «Qazaqstan» ulttyq arnasy tikeleı efırde kórsetetin bolady.
Qanat Islam qazirge deıin kásibı rıngte 20 jekpe-jek ótkizip, barlyǵynda jeńiske jetti, sonyń 17-in nokaýtpen aıaqtady. Boksshy birinshi orta salmaqta (69 keli) WBA Fedelatin jáne WBA FideCaribe nusqalary boıynsha álem chempıony.
Kúnsultan Otarbaı
