Qanat Islamnyń eks-qarsylasy súrindi - GGG men Canelo aıqasynyń anderkarty

ASTANA. QazAqparat - Qazaqstandyq kásipqoı boksshy Qanat Islamnyń burynǵy qarsylasy kanadalyq boksshy Brendon Kýk Las Vegastaǵy T-Mobile Arena-da Gennadıı Golovkın men Saýl Alvares aıqasynyń anderkartynda jekpe-jekke shyqty, dep habarlaıdy QazAqparat tilshisi.

Kanadalyq boksshy Haıme Mýngııamen kezdesti. Bar-joǵy 22 jastaǵy meksıkalyq bul kúnde tanymal boksshy bolyp qalǵan. Á degende aýyr soqqylarymen Kýkty sastyryp alǵashqy raýndta basym tústi.

Qarsylastyń qarym-qabiletin sezgen kanadalyq ekinshi raýndta qımylyn shırata túsken. Alaıda Mýngııa orta jáne alys qashyqtyqta kanadalyqty jolatpaı búıirden aýyr soqqylardy daryta bildi. Ekinshi raýndtyń sońǵy sekýndtarynda tipti Mýngııa qarsylasyn qulatatyndaı kóringen. Alaıda bul joly da Kýkty gong qutqardy.

Úshinshi raýndta Kýk nogdaýnǵa tústi. Dál osyndaı taǵy bir-eki shabýyl aıqasqa núkte qoıyp, meksıkalyq óz ataqtaryn abyroımen qorǵap qaldy.

Atalmysh jekpe-jekten Mýngııa 250 myń AQSh dollaryn, al Kýk 30 myń AQSh dollaryn tapty.

Eske sala ketsek, byltyr 9 qyrkúıekte Astanada ótken boks keshi aıasynda qazaqstandyq Qanat Islam (24-0, 19KO) dál osy kanadalyq Brendon Kýkty (18-0, 11KO) jeńip, óz ataqtaryn qorǵap qalǵan bolatyn. «Saryarqa» sport kesheninde ótken keshte «Qazaq» kanadalyq «Jaman balany» 9-raýndta tize búktirgen edi.

Foto: insidehboboxing.com