Qanat Islammen qatar óner kórsetken qazaq boksshylarynyń reıtıngi joǵarylady

NUR-SULTAN. QazAqparat – Ótken aptada Almatyda ótken kásipqoı boks keshinen keıin qazaq boksshylary Saparbaı Aıdarov, Rýslan Myrsataev pen Arman Rysbektiń tanymal Boxrec.com saıtyndaǵy reıtıngteri joǵarylady, dep habarlaıdy QazAqparat tilshisi.

Atalmysh boksshylar Qanat Islam-Ýolter Kaýtondokva boks keshiniń anderkartynda judyryqtasqan bolatyn.

VKontakte jelisindegi «Qazaqstan kásipqoı boksy» paraqshasynda jarııalanǵandaı, ýkraınalyq ıAroslav Manýılovty jeńgen boksshy Saparbaı Aıdarov (4-0, 2KO) Boxrec.com reıtınginde 526-shy orynnan 356-ǵa kóterilgen. Al aýyr salmaqtaǵy Rýslan Myrsataev (7-0, 6KO) belarýs ıÝrıı Byhovtsevtan (10-18-3, 5KO) basym túsip, 191-shi orynnan 114-ke biraq joǵarylady.

Boxrec.com-daǵy aıqyn serpilisti ózbek boksshysyn alǵashqy 58 sekýndta úıine qaıtarǵan Arman Rysbek (7-0, 6KO) kórsetip otyr. Kásipqoı bokstaǵy jetinshi jeńisinen keıin Arman 526-shy orynnan 201-ge jyljyp, kórsetkishin edáýir jaqsartty.

Eske sala keteıik, qazaqstandyq kásipqoı boksshy Qanat Islam namıbııalyq Ýolter Kaýtondokvamen qolǵap túıistirip, jeńiske jetken bolatyn. Aıqas Almaty qalasyndaǵy Balýan Sholaq atyndaǵy sport saraıynda ótti. Jekpe-jek on raýndqa sozyldy. Tóreshiler sheshimimen Qanat Islam jeńip, WBO belbeýine qol jetkizdi. Ol osylaısha 27-shi ret qarsylasynan basym tústi. BoxRec reıtıngine sáıkes, Qanat 137.9 upaımen orta salmaqta 17-orynǵa jaıǵasty (jekpe-jekke deıin Qanat 89.59 upaımen 41-orynda bolǵan). Al qarsylasy Ýolter Kaýtondokva (18-2, 17 KO) 67.88 upaımen 25-orynnan 41-orynǵa syrǵydy.