Qanat Islam jeńimpaz retindegi alǵashqy sálemin joldady
ASTANA. QazAqparat - AQSh-tyń Florıda shtatyndaǵy Leıklend qalasynda ótken kásipqoı bokstan WBA Fedelatin jáne WBA FideCaribe nusqalary boıynsha Álem chempıony Qanat Islam 21 kezdesýinde Hýan de Anheldi tehnıkalyq nokaýtpen utty.
Kolýmbııalyq kásipqoı boksshy Hýan de Anheldi altynshy raýndta tize búktirgen Qanat Islam sharshy alańǵa qazaq taqııasyn kıip, Kók Týymyzdy jamyla jelbiretip shyqty. Sonymen qatar, Qanat Islam Jeńis kúnindegi bul jeńisin barsha Qazaq eline arnaıtynyn da jetkizip qaldy. «Assalaýmaǵaleıkým Qazaq eli! Óte qýanyshtymyn! Baýyrjan aǵa, Sizge rahmet! Qazaq eli tynysh bolsyn! Rahmet!» dedi Qanat Islam. Eske salaıyq, sharshy alańdaǵy bul jekpe-jek Qazaqstan ulttyq arnasynda tikeleı efırde kórsetilgen bolatyn.
«Qazaq» laqap atymen álemdik kásipqoı boksta tanyla bastaǵan Qanat Islam kezekti jeńisi arqyly óziniń mártebesin arttyryp keledi. Jerlesimiz áýesqoı boksta jankúıerler kóńilinen shyǵyp, kásipqoı boksta da óziniń joıqyn soqqy ıegeri ekenin kórsetip, keremet nakaýttarymen tanylyp otyr.
Qanat Islamnyń bul sharshy alańdaǵy 21-i kezdesýi bolatyn. Ol buǵan deıingi jıyrma kezdesýiniń barlyǵynda jeńiske jetip, onyń 17-isinde qarsylastaryn nokaýtpen sulatqan edi. Endi nokaýtter sany 18-ge jetip otyr, sonyń ishinde jerlesimiz qatarynan alty kezdesýdi merziminen buryn aıaqtady.
Búgingi sharshy alańda kolýmbııalyq jas boksshy da qazaqstandyq bylǵary qolǵap sheberiniń shyn myqty ekenin moıyndap, onyń kúrzi soqqysyna shydas bere almady.
