Qanat Islam jeltoqsan aıynda taǵy bir jekpe-jek ótkizýi múmkin
ASTANA. QazAQparat - WBA FedeCaribe tujyrymynyń chempıony qazaqstandyq belgili kásipqoı boksshy Qanat Islam jeltoqsan aıynyń ortasynda taǵy bir kezdesý ótkizýi múmkin, dep habarlaıdy QazAqparat tilshisi. Bul týraly boksshy Qazaqstan Ulttyq arnasynyń «Tańsholpan» baǵdarlamasyna bergen suhbatynda málim etti.
«Jalpy, komandamyzdyń jospary boıynsha jeltoqsan aıynyń ortasynda taǵy bir kezdesý ótkizý josparda bar. Ony promoýterlerim sheshetin bolady. Usynys jasaǵan boksshylar da jetkilikti, múmkin bolsa jańa jylǵa deıin taǵy bir keremet boks keshin ótkizemiz», - dep atap ótti Qanat Islam.
Osy oraıda aıta keteıik, búgin Islamnyń týǵan kúni. Ol 1984 jyly 13 qyrkúıekte Shyńjań Uıǵyr avtonomııaly aýdany, Altaı aımaǵy, Qaba aýdanynda dúnıege kelgen.
Ol - áýesqoı boksta júrgende Qytaı Halyq Respýblıkasynyń Ulttyq quramasynda Beıjiń Olımpıadasy men Chıkagoda ótken Álem chempıonatynyń (2007) jáne Azııa oıyndarynyń (2006) qola júldegeri atanǵan bolatyn. Qytaıdyń 10 dúrkin chempıony. Qanat Islam tarıhı Otanyna 2010 jyly oralyp, qazir kásipqoı boksta, Nelson promoýterlik klýby atynan sharshy alańǵa shyǵyp júr. Qazirge deıin 25 jekpe-jek ótkizip, barlyǵynda jeńiske jetken. Sońǵy jekpe-jegin 9 qyrkúıek kúni Astanada Brendon Kýkke qarsy ótkizip, tehnıkalyq nokaýtpen jeńiske jetken bolatyn.
